İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 182 Hüküm no: 121 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın, Beyşehir mütesellimi İbrahim Edhem Efendi’ye açtığı davasını geri çektiği 6000 guruşdan meccânen ibrâ Ma‘rûz Anadolu’da Beyşehir kazâsına muzâfe Karadiken karyesi ahâlîsinden sahib-i arzuhâl Baklavacıoğlu es-Seyyid el-Hâc Hasan Ağa b. es-Seyyid el-Hâc Abdülbaki nâm kimesne evvelen Çarşamba günü Arz Odası’nda huzûr-ı lâmi‘u’n-nûr-ı sadâret-penâhîlerinde ve ba‘dehû bi’t-terâzî dâ‘îhânelerinde ma‘kūd meclis-i şer‘-i münîrde mukaddemâ Beyşehir sancağı mütesellimi olup bu def‘a yine livâ-i mezbûra taraf-ı saltanat-ı seniyyeden mütesellim nasb olunan hâcegân-ı Dîvân-ı hümâyûndan derûn-ı arzuhâlde mezkûru’l-ism İbrahim Edhem Efendi b. Süleyman muvâcehesinde mûmâ-ileyh İbrahim Edhem Efendi mukaddemâ livâ-i mezbûr mütesellimi iken beni bi-gayr-ı hakkın habs ve cerîme nâmıyla mâlımdan zulmen altı bin guruş ile dört yüz guruş kıymetli bir re’s katırımı ahz ve istihlâk etmekle nakd-i merkūm ile zikrolunan katırın kıymet-i şer‘iyyesini [27a] mûmâ-ileyhden istirdâd ederim deyü da‘vâya tesâddî etmişdim el-hâletü hâzihî ben da‘vâ-yı mezkûremden rızâmla meccânen fâriğ olup bi’l-cümle husûs-ı mezkûra <> ve sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrini mûmâ-ileyh İbrahim Edhem Efendi tasdîk eylediği İstanbul Mahkemesi’nden huzûr. Fî-gurreti R sene 1242