İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 188 Hüküm no: 125 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanko v. Manol’ün, Samatya’daki Mirahur Fırını’ndaki hisselerinin yarısını Mehmed Arif Efendi’ye sattığı Nısf habbâz fırını mübâya‘ası Ma‘rûz Âsitâne-i aliyyede vâki‘ habbâz esnâfından Yanko v. Manol zimmî meclis-i şer‘-i münîrde şehrî Mehmed Ârif Efendi b. Ali tarafından ber-vech-i âtî tasdîka vekîl-i şer‘îsi habbâzân kethudâsı Mehmed Ağa b. Abdullah muvâcehesinde İstanbul’da Samatya kurbünde vâki‘ Mirâhur Fırını demekle meşhûr yedi horoslu ekmekçi ve beş horos uncu olarak on iki horoslu bir kıt‘a fırın ma‘a-değirmen derûnlarında mevcûde beyne’l-esnâf gedik ta‘bîr olunur kırk sekiz re’s bargir ve sâir âlât-ı lâzıme-i ma‘lûme müstakillen yedimde mülküm olmağla hâlâ ben ber-vech-i muharrer mâlik olduğum âlât-ı gedik-i mezkûrun nısf-ı şâyi‘lerini mülkümde ibkā ve nısf-ı âharları olan yirmi dört re’s bargir ve onlara isâbet eden sâir âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin müvekkil-i mûmâ-ileyh Mehmed Ârif Efendi’ye on iki bin guruşa bey‘ ve temlîk ve vech-i lâyıkı üzre teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm on iki bin guruşu benim zahîre semeninden cânib-i mîrî ve kapan tüccârına deynim olan ol mikdâr guruşa mahsûben şurûtu üzre mahallerine te’diye ve îfâya ihâle eylediğimde onlar dahi vech-i meşrûh üzre şurûtuna tatbîkan mahallerine edâ ve îfâya ta‘ahhüd etmeleriyle bey‘-ı mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d sâlifü’z-zikr yirmi dört re’s bargir ve onlara isâbet eden sâir âlât-ı lâzıme-i ma‘lûme müvekkil-i mûmâ-ileyh Mehmed Ârif Efendi’nin mülk-i müşterâsı ve hakk-ı sırfı olup benim nısf hisse-i mezkûrede alâkam kalmamışdır deyü ba‘de’t-takrîr ve’t-tasdîk sâlifü’z-zikr yirmi dört re’s bargir ve onlara isâbet eden sâir âlât-ı lâzıme-i ma‘lûme kaydı bâyi‘-i mersûm Yanko zimmînin üzerinden ref‘ ve terkīn ve sûretinden dahi ifrâz ve müvekkil-i mûmâ-ileyh Mehmed Ârif Efendi ismine tashîhan kayd ile yedlerine başka başka sûret i‘tâsını istid‘â eyledikleri İstanbul Mahkemesi’nden huzûr. Fî 26 Ra sene 1242