İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 191 Hüküm no: 127 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun Vakfı tevliyetinin Hafize bt. Abdullah’a tevcih edilmek istendiği Tevliyet tevcîhi istid‘âsı Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul’da Kumkapı nezdinde İbrahim Paşa Câmi‘-i şerîfinde va‘azıyye için merhûme Emine Hatun Vakfı’nın yevmî bir akçe <> vazîfe ile tevliyeti evvelen hayatda oldukça kendi nefsine ve ba‘de vefâtihâ atîkasından Emetullah Hatun’a ve ba‘dehâ mezbûre Emetullah’ın evlâd ve evlâd ve evlâdının eslah ve erşedine ve ba‘de inkırâzihim evlâd-ı atîkatdan Bahri Hatun’un zevci Abdullah Ağa’ya ve ba‘dehû mezbûrun evlâd ve evlâd ve evlâdının kezâlik eslah ve erşedine ve ba‘de inkırâzi’l-küll sâlifü’z-zikr İbrahim Paşa Vakfı mütevellîsi olanlara meşrûta idüğü küçük evkāf muhâsebesinde mukayyed vakfiye-i ma‘mûlün-bihâsında musarrah olmağla tevliyet-i mezkûreye derkenâr mantûkunca ber-mûcib-i şart-ı vâkıfa ve amel-i kadîm-i meşrûtiyyet üzre berat-ı âlî-şânla mutasarrıfe olan mezbûre Bahri Hatun’un sadriye kızı Hadîce Hatun ibnetü’l-mezbûr Abdullah’a bu esnâda fevt olup yeri ve hizmet-i lâzımesi mu‘attal kaldığı ve kendi dahi mütevellî-i mezbûre Hadîce Hatun’un li-ebeveyn kız karındaşı ve merkūm Abdullah Ağa’nın sadriye kızı müteveffât Ümmü Gülsüm Hatun’un sadriye sahîha kızı ve ol vechile mezbûrun evlâd ve evlâdından olup şart-ı vâkıfa ve te‘âmül-i kadîme üzre tevliyet-i mezkûrenin meşrûtun-lehâ olduğu beyânıyla tevliyet-i mezkûre müteveffât-ı mezbûre mahlûlünden meşrûtiyyet üzre kendiye tevcîh buyurulmasını sahibe-i arzuhâl Hafize bt. Abdullah nâm hatun istirhâm eylediği mefhûm-ı arzuhâlden müstebân ve keyfiyet-i tevliyet minvâl-i muharrer üzre olduğu derkenârdan müstefâd ve nümâyân ve amel-i kadîm dahi şurût-ı vakfiye-i mezkûre üzre cârî olarak nevbet-i tasarruf-ı tevliyet kendisinin ve idâreye dahi iktidârı olduğu vukūf-ı tâmları olan bî-garaz Müslimînden Mustafa Tevfîk Efendi b. Mehmed Emin ve Balmumcu el-Hâc Mehmed Ağa b. Ebîbekir ve Kömürcü el-Hâc Ali Ağa b. Mustafa nâm kimesnelerin meclis-i şer‘-i şerîfde mârrü’z-zikr İbrahim Paşa Vakfı mütevellîsi Hâfız Mehmed Derviş Efendi mahzarında alâ-tarîkı’ş-şehâde ihbârlarıyla zâhir ve ayân olmağın bu sûretde tevliyet-i mezkûre müteveffât-ı mezbûre mahlûlünden vazîfe-i mersûmesiyle meşrûtun-lehâsı mezbûre Hafize Hatun’a tevcîh ve şurûtu derciyle kaleminden yedine bir kıt‘a berat-ı şerîf-i âlî-şân inâyet ve ihsân buyurulmak bâbında fermân-ı âlîleri sudûru iktizâ eylediği İstanbul Mahkemesi’nden huzûr. Fî 11 R sene 1242