İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 193 Hüküm no: 129 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yerebatan ve civarında mağaza ihdas ederek bakkala mahsus erzak satılmasının men edildiği Yerebatan ve sâir mahallerde ihdâs olunan mağazalarda bakkālâna mahsûs erzâk bey‘ etmemeğe ta‘ahhüd Ma‘rûz Sâdır olan fermân-ı âlîlerine imtisâlen istid‘â ve derkenâra ba‘de’n-nazar ashâb-ı arzuhâl Âsitâne-i aliyyede vâki‘ bakkālân pazarbaşısı Süleyman Ağa ve bölükbaşısı Abdi Çelebi ile nizâm ustalarından Yorgi ve Todori ve İstefan ve Kiryako zimmîler ve sâirleri şifâhen sâdır olan emr-i cihân-mutâ‘ları mûcibince Çarşamba günü Arz Odası’nda huzûr-ı lâmi‘u’n-nûr-ı âsafânelerinde ma‘kūd meclis-i şer‘-i münîrde derûn-ı arzuhâlde mezkûru’l-ism Ayasofya’da sâkinler Arapgirli Osman b. Veli ve Musa b. Hüseyin ve Ali b. Musa ve Hüseyin b. Mehmed ve Ebû Bekir b. Hasan ve Mehmed b. Cafer ve Habib b. Mehmed ve Mustafa b. Ali ve Osman b. İsmail Vusûlî Manastır’da sâkin İsmail b. Ahmed ve Yerebatan’da sâkin Ali b. Veli nâm kimesneler muvâcehelerinde merkūmûn bundan akdem Enderûn-ı hümâyûn ta‘yînâtından fazla diyerek yağ ve bal ve pirinç ve kuru ve yaş kaşkaval ve tulum ve çayır ve lor ve dil peyniri ve envâ‘-ı kuru üzüm ve incir ve bâdem ve fındık ve fıstık ve yumurta ve tuz ve pasdırma ve sucuk ve sabun ve sirke ve sarımsak ve soğan ve zeytin ve envâ‘-ı şa‘riye ve nohud ve bakla ve mercimek ve böğrülce ve döğülmüş hınta ve arpa ve sâir bu misillü bakkāl metâ‘ı olan erzâk-ı mütenevvi‘ayı mahâll-i mezkûrede ihdâs eyledikleri mağazalarında diledikleri gibi <> bey‘ etmekde iken bu def‘a bâ-irâde-i seniyye o makūle fazla itlâfının memnû‘iyeti sebebiyle erzâk-ı mezkûreyi tüccârdan iştirâ ve mağazalarında gālî bahâ ile fukarâya bey‘a ictirâ etmeleriyle bu keyfiyet hilâf-ı emr-i âlî olduğundan mâ‘adâ şurût-ı nizâm-ı kadîmimizin ihtilâliyle cümlemizin perîşânî-i hâlini mûcib ve ibâdullâha dahi gabn ve hasârı müstevcib olmağla o makūle hilâf-ı emr-i âlî hareketden men‘ olunması murâdımızdır dediklerinde onlar dahi cevâblarında mazmûn-ı emr-i âlîyi [âlî] ve nizâm-ı mezkûr vech-i muharrer üzre olduğunu ve ber-vech-i meşrûh hilâf-ı nizâm hareketlerini i‘tirâf etmeleriyle bu sûretde hilâf-ı nizâm hareketleri mazmûn-ı emr-i âlî-şâna mugāyir olduğu merkūmûna tefhîm ve lisânen sâdır olan fermân-ı âlîleri üzre bayağı arpa bey‘ etmemeğe bakkāl tâifesi mesfûrûna tenbîh olunduğu İstanbul Mahkemesi’nden huzûr. Fî 13 Ra sene 1242