İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 194 Hüküm no: 130 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Derviş Bey’in, babasının ölümünden Defterdar Mehmed Efendi Vakıfları tevliyetini talep ettiği Tevliyet tevcîhi istid‘âsı Ma‘rûz Sâdır olan fermân-ı âlîlerine imtisâlen istid‘â ve derkenâra nazar olundukda İstanbul’da Kumkapı kurbünde Dülbendci mahallesinde vâki‘ sâbıkā defterdâr-ı şıkk-ı evvel merhûm Mehmed Efendi Evkāf-ı şerîfinin yevmî otuz akçe vazîfe ile tevliyetine mutasarrıf olan evlâd-ı vâkıfdan pederi es-Seyyid Mehmed Tahir Bey fevt olup tevliyet-i mezkûre hâlî kaldığından bahisle tevliyet-i mezkûre peder-i merkūmun mahlûlünden vazîfe-i mezkûresiyle kendiye tevcîh buyurulmasını sahib-i arzuhâl es-Seyyid Mehmed Derviş Bey kulları istid‘â ve merkūm es-Seyyid Mehmed Derviş Bey evlâd-ı vâkıfdan müteveffâ-yı merkūm es-Seyyid Mehmed Tahir Bey’in sulbî sahîh oğlu olup tevliyet-i mezkûreye vücûhla elyak olduğunu Şâh-zâde Câmi‘i muvakkiti Mustafa Efendi b. Hâfız Mehmed ve müezzini Ali Efendi b. Mehmed ve Kumkapı bekçisi Mustafa b. Abdullah ve su yolcu Mehmed b. Osman nâm kimesneler ihbâr ve inhâ etmeleriyle tevliyet-i mezkûre müteveffâ-yı mezbûrun mahlûlünden erbâb-ı istihkākdan olduğu ihbâr olunan sulbî oğlu evlâd-ı vâkıfdan merkūm es-Seyyid Mehmed Derviş Bey’e tevcîh ve yedine berat-ı âlî-şân ihsân buyurulmak bâbında emr u fermân hazret-i veliyyü’l-emrindir. Fî 15 R sene 1242