İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 195 Hüküm no: 131 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veliyüddin Ağa ve ortaklarının kuru yemişçilik ortaklığı feshinde beş bin guruşa sulh oldukları Kuru yemişçilik şirketine 5000 guruşa sulh ve ibrâ Ma‘rûz Âsitâne-i aliyyede vâki‘ kuruyemişçi esnâfından arzuhâl eden es-Seyyid Veliyüddin Ağa b. es-Seyyid Ahmed nâm kimesne meclis-i şer‘-i münîrde derûn-ı arzuhâlde isimleri mezkûr Tophâne-i âmire tüfenkçilerinden soldan birinci Mahmud Onbaşı b. Mahmud ve li-ebeveyn er-karındaşı Mehmed ve es-Seyyid Kara Ali b. Ahmed nâm kimesneler muvâcehelerinde bin iki yüz kırk bir senesi Saferü’l-hayrı gurresinde fâide-i hâsıla beynimizde beraber iktisâm olunmak üzre ben mezbûrdan Mahmud Onbaşı ve Mehmed ve es-Seyyid Ali ile gāibûn ani’l-beled diğer Mehmed ve Cezayirli âhar Mehmed ve Şehâblı Ali nâm kimesnelerden her birimiz sermâye-i ma‘lûme vaz‘ıyla kuru yemişçilik ticâretinde ınânen akd-i şirket ve sene-i mezbûre Şevvali’l-mükerremi gāyetine gelince dokuz ay müddet İstanbul’da Zindânkapısı hâricinde iskele başında vâki‘ müstakillen gediğine mâlik olduğum bir bâb kuru yemişçi dükkânında şerîkler olduğumuz hâlde ticâret edip ba‘dehû fesh-i akd-i şirket-birle hesâbımızı esnâfımızın lonca odasında kethudâ ve yiğitbaşı ve müsin ihtiyâr ustalarımız hazır oldukları hâlde sehv ü galatdan ârî yegān yegān hesâb-ı sahîh ile rü’yet eylediğimizde kat‘a fâide-i hâsıla olmayıp ancak teslîm eylediğimiz re’s-i mâlden şirket-i mezkûreden hâric kendi umûrlarına sarfla istihlâk edip zimmetlerinde her birinin [29b] iki bin beş yüz altmış yedi guruş yirmi dörder paradan zamânen bana deynleri olduğu mütehakkık olan cem‘an yedi bin yedi yüz bir guruş yetmiş iki parayı mezbûrûn Mahmud Onbaşı ve Mehmed ve es-Seyyid Ali’den taleb ederim deyü tesâddî eylediğim da‘vâmdan bi’t-tav‘ ve’r-rızâ mezbûr Mahmud Onbaşı ile iki bin guruşa ve karındaşı mezbûr Mehmed ile bin beş yüz guruşa ve mezbûr es-Seyyid Ali ile kezâlik bin beş yüz guruş ki cem‘an beş bin guruş üzerine sulh olduğumda onlar dahi sulh-ı mezkûru ba‘de’l-kabûl bedel-i sulh-ı merkūm beş bin guruşdan mâ‘adâya ve bi’l-cümle husûs-ı şirkete ve sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü mukırr-ı mezbûr es-Seyyid Veliyüddin Ağa’nın bi’l-cümle takrîr-i meşrûhunu <<üzre>> mezbûrûn tasdîk ve ibrâdan istisnâ olunan bedel-i sulh-ı mezkûr beş bin guruş vech-i meşrûh üzre zimmetlerinde müdde‘î-i mezbûra sahîhan deyni olduğunu tâyi‘an ve kat‘iyen her biri ikrâr ve i‘tirâf etmeleriyle alâ-mûcib-i i‘tirâfihim bedel-i sulh-ı mezkûr beş bin guruşun vech-i meşrûh üzre müdde‘î-i mezbûr es-Seyyid Veliyüddin Ağa’ya edâsıyla mezbûrûn Mahmud Onbaşı ve karındaşı Mehmed ve es-Seyyid Kara Ali’den her biri ilzâm olundukları İstanbul Mahkemesi’nden huzûr. Fî 11 R sene 1242