İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 196 Hüküm no: 132 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofular’da Haremeyn Vakfı’na ait eve, İmam Hacı Mustafa Efendi Vakfı mütevellisinin el koymasının men’i Sofular’da menzil keşfi Ma‘rûz Sâdır olan fermân-ı âlîlerine imtisâlen zikri câ’î husûsu ber-nehc-i şer‘î istimâ‘ ve fasl u hasm için savb-ı şer‘-i enverden me’zûnen irsâl olunan Kâtib es-Seyyid Salih Afîf Efendi dâ‘îleri bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi tarafından mürsel kâtib Abdülkadir Efendi ve hâssa mi‘mârı hulefâsından es-Seyyid Mehmed Râşid ve İsmail Ferrûhî Halîfeler ile İstanbul’da Sofular mahallesinde hamam karşısında olan zukāk içinde kâin İç-ili mütesellimi-i esbak Maktûl Ahmed Usta menzili demekle meşhûr bir bâb kebîr menzile varıp huzûr-ı Müslimînde akd-i meclis-i şer‘-i nebevî ettiklerinde Haremeyn-i şerîfeyn vakfı mütevellîsi sahib-i arzuhâl Elmas Osman Ağa b. Mustafa tarafından vekîl-i müseccel-i şer‘îsi el-Hâc Hâfız Ömer Efendi b. İbrahim meclis-i ma‘kūd-ı mezkûrda nezâret-i dâ‘îlerinde olan evkāfdan merhûm İmâm Hacı Mustafa Efendi Vakfı’nın mütevellîsi olup menzil-i mezkûra merkūm Hacı Mustafa Efendi Vakfı olmak üzere vaz‘-ı yedi beyyine ile sâbit ve mütehakkıka olan Cemile Hanım bt. el-Hâc Yusuf’un sadrî oğlu ve tarafından kezâlik vekîl-i müseccel-i şer‘îsi Mehmed Ağa b. el-Hâc Yakub muvâcehesinde işbu derûnunda akd-i meclis-i şer‘-i âlî olunan bir bâb menzile mutasarrıf olan merkūm Ahmed Usta bu def‘a bilâ-veled fevt oldukda mütevellî vekîli merkūm Mehmed Ağa bağçe mahâllinde kâin mi‘mârân-ı mezbûrân misâhalarıyla terbî‘an beş yüz yetmiş dokuz zirâ‘ mahalli Haremeyn Vakfı olmak üzre tasdîk ve âlâmât-ı fâsıla vaz‘ıyla terk ve mâ‘adâ bi’l-cümle menzil-i mezkûru yedinde olan vakfiye-i ma‘mûlün-bihâ mantûkunca merkūm İmâm Mehmed [Hacı Mustafa] Efendi Vakfı’dır deyü bi’t-tevliye zabt ve vaz‘-ı yed-birle âhara îcâr etmek üzre olup lâkin mücerred menzil-i mezkûr dahi Haremeyn Vakfı olmak üzre defter-i evkāfda muharrer olmağla öyle olıcak menzil-i mezkûrdan keff-i yedine tenbîh olunmak matlûbumdur deyü da‘vâ ettikde ol dahi cevâbında ber-vech-i muharrer beş yüz yetmiş dokuz zirâ‘ mahalli Haremeyn Vakfı olduğunu tasdîk ve terk-birle mâ‘adâ müdde‘âsını inkâr ettikde evvelen müdde‘î-i vekîl-i merkūm iddi‘â eylediği mahalli ber-nehc-i şer‘î tahdîd ve isbâta kādir olamamağla yalnız defter-i vakf kaydı ve kavl-i mücerrediyle menzil-i mezkûra müdâhaleye şer‘an kādir olmadığını ve sâlifü’z-zikr beş yüz yetmiş dokuz zirâ‘ mahâll-i mümtâz ve mu‘ayyeni Haremeyn-i şerîfeyn vakfından ve mâ‘adâ menzil-i mezkûr dahi merkūm İmâm Mustafa Efendi Vakfı’ndan zabt ve âhara îcâr olunmak iktizâ eylediğini mevlânâ-yı mûmâ-ileyhimâ mahâllinde bi’l-ma‘iyye tarafeyne tefhîm-birle ketb ve tahrîr ve ma‘an meb‘ûs ümenâ-i şer‘le evvelen Pazar günü Saray-ı hümâyûnda Dîvân odasında huzûr-ı hazret-i ağa-yı Dârü’s-sâ‘adeti’ş-şerîfede ve sâniyen yazıcı efendi odasında ve sâlisen dâ‘îhânemizde ma‘kūd meclis-i şer‘-i şerîfe gelip alâ-vukū‘ihî inhâ ve takrîri ba‘de’t-tenfîz Haremeyn mütevellîsi vekîli merkūm dahi verilen cevâb-ı şer‘î ile mücâb ve mülzem ve bu vechile râzı ve menzil-i mezkûr ile mahâll-i merkūmu mütevellî-i mezbûr ile ma‘an âhara îcâr ve külliyen kat‘-ı nizâ‘ eyledikleri İstanbul Mahkemesi’nden huzûr. Fî 15 R sene 1242 Nüshateyn