Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 365 Hüküm no: 412 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlyandi v. Kondistadilo’nun Mısır Valisi Hamza Paşa’ya ait buğdayın bir kısmının Ali Paşa tarafından alınıp kalanın İstanbul’a getirilip teslim edildiği Sefîne reislerinden İstanköylü İlyandi v. Kondistadilo nâm zimmî meclis-i şer‘-i şerîf-i enverde ve mahfil-i dîn-i münîf-i ezherde hâlâ mısr-ı Kahire vâlisi olan düstûr-ı zî-şân vezîr-i âsaf-nişân râkibü huyûli’l-iz ve’l-ikbâl sâhibü ricâli’l-mecd ve’l-iclâl sa‘âdetlü Hamza Paşa -dâme birruhû ve fesâhû- hazretleri taraf-ı bâhirü’ş-şereflerinden husûs-ı âti’l-beyâna vekîl-i sâbitü’l-vekâleleri olan zahrü’l-emsâl Yahya Ağa mahzarında takrîr-i kelâm ve ta‘bîr ani’l-merâm edip vezîr-i müşârün-ileyh hazretleri mahrûse-i mezkûrede olan etbâ‘ından Ömer Ağa İskenderiye limanından İstanbul’a nakl için bin iki yüz doksan dokuz keyl buğdayını sefîneme tahmîl ben dahi kabz edip İstanbul’a gelirken sâbıkan teftîşe me’mûr olup hâlâ İstanköy muhâfızı olan Ali Paşa hazretleri mârrü’z-zikr buğdaydan altı yüz bir keyl buğday bi gayri hakkın cebren yedimden ahz u kabz ve tesellüm ve kabzı nâtık yedime temessük verdikden sonra hâlâ mahmiye-i İstanbul’a gelip bâkī kalan sekiz yüz doksan sekiz keyl buğdayı mûmâ-ileyh Yahya Ağa’ya teslîm ol dahi ahz u kabz etmeğin hâlâ mûmâ-ileyh Yahya Ağa’ya suâl olunup takrîri tahrîr olunması matlûbumdur dedikde gıbbe’s-suâl mûmâ-ileyh Yahya Ağa cevâbında fi’l-hakīka hâl bâlâda meşrûh ve beyân olunan minvâl üzre olup mezkûr İlyandi Reis’den sekiz yüz doksan sekiz keyl buğday ahz u kabz ve tesellüm eylediğini bi’t-tav‘ ikrâr ve i‘tirâf etmeğin mûmâ-ileyh Yahya Ağa’nın vech-i meşrûh üzre olan i‘tirâfı bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, el-Hâc Mustafa b. Tevekkül, Mustafa Çelebi b. Abdülmümin, Mehmed b. Derviş.