İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 202 Hüküm no: 140 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suğla sancağında İbrahim Paşa Vakfı mütevellisi ile Mahmud Çelebi ve Isfahan Hatun Vakfı mütevellisi nizalarının fetvahaneye havale edildiği Mazbata kaydı Ma‘rûz Haremeyn-i şerîfeyn müsakkafâtından olup ashâb-ı hayrâtdan sadr-ı esbak İbrahim Paşa b. Halil Paşa’nın hâmiş-i arzuhâlde muharrer Dîvân-ı hümâyûn kaleminden muhrec bir kıt‘a berat-ı âlî-şânda tafsîl ve beyân olunduğu üzre İstanbul’da ve medîne-i İznik ve Kastamonu’da kâin câmi‘-i şerîf ve medrese-i münîf ve mekteb-i şerîfi vakıfları müsakkafâtından Anadolu’da Suğla sancağında vâki‘ Cünye nâhiyesine nefs-i karye-i Dalama ve tevâbi‘i olan kurâhânın evlâdiyet ve meşrûtiyyet üzre mütevellîsi olan derûn-ı arzuhâlde mezkûru’l-ism İsmail Bey b. İbrahim Bey bi’l-ma‘iyye rü’yete me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi tarafından meb‘ûs Kâtib es-Seyyid Hüseyin Efendi ma‘iyyetiyle akd olunan meclis-i şer‘-i enverde yine ashâb-ı hayrâtdan Hayreddîn Paşa ve oğlu İbrahim Paşa ve onun oğlu Mahmud Çelebi ve vâlidesi Isfahan Hatun’un zikrolunan medîne-i İznik’de kâin imâret-i âmiresi vakfının bi’l-meşrûta mütevellîsi ve nâzırı evlâd-ı vâkıfdan sahib-i arzuhâl silâhşorân-ı hâssadan Mehmed Ferhad Bey b. el-Hâc Osman Bey mahzarında zikrolunan Dalama ve tevâbi‘i olan kurâhânın beher sene hâsılâtı dört sehm i‘tibârıyla bir sehmi benim mütevellîsi olduğum vakf-ı müşârün-ileyh İbrahim Paşa Vakfı tarafından ve üç sehmi dahi mûmâ-ileyh Mehmed Ferhad Bey’in mütevellîsi olduğu mûmâ-ileyh Mahmud Çelebi ve Isfahan Hatun Vakıfları tarafından yedimde olan işbu vakfiye-i ma‘mûlün-bihâ ile bin yüz elli altı senesi târihiyle müverrah bir kıt‘a muhâsebe defteri mantûklarınca zabt ve tasarruf ve te‘âmül-i kadîm bu vechile cârî ve mûmâ-ileyh Mehmed Ferhad Bey dört seneden beri hâsılât-ı mezbûreden bir sehm hisseme isâbet eden mebâliği tamamca bana edâ edegelir iken bu def‘a noksan teklîfiyle bi-gayr-ı hakkın mümâna‘at etmekle mümâna‘atı def‘ olunmak matlûbumdur deyü da‘vâ ettikde ol dahi cevâbında sâlifü’z-zikr Dalama ve tevâbi‘i olan kurâhânın beher sene hâsılâtı benim mütevellîsi olduğum Mahmud Çelebi ve Isfahan Hatun Vakıfları tarafından zabt ve tasarruf olunagelip yedimde olan defter-i hâkānî mûcibince müdde‘î-i mûmâ-ileyh İsmail Bey mütevellîsi olduğum vakf-ı müşârün-ileyh tarafına defter-i hâkānî-i merkūmda hâsılât-ı mezkûreden ancak senevî altı bin üç yüz otuz yedi akçe hâsılât mukayyed iken müdde‘î-i mûmâ-ileyh hâsılât-ı mezkûrenin bir sehmini ben alırım diyerek sinîn-i merkūmede bir-takrîb bi-gayr-ı hakkın benden on dört bin beş yüz guruşu almağla istirdâd ederim dedikde tarafeyn fetvâ-yı şerîfe[ye] havâle olunup bir dahi meclis-i şer‘e gelmemeleriyle henüz da‘vâlarına faysal verilmediği bir buçuk ay mukaddem târihiyle mazbût olmağın imtisâlen li’l-emri’l-âlî da‘vâlarının sûret-i zabtı İstanbul Mahkemesi’nden huzûr-ı âlîlerine i‘lâm olundu. Fî 29 R sene 1242