İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 213 Hüküm no: 151 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrade gereğince sahipleri Arnavut olanDeniz Hamamı Fırını’na devlet tarafından el konulup mezada verildiği Cânib-i mîrîden Deniz Hamamı Fırını mübâya‘ası Ma‘rûz Zahîre nâzırı izzetlü Mehmed Ârif Efendi bendeleri Âsitâne-i sa‘âdet ve bilâd-ı selâsede vâki‘ Arnabud fırınlarının Müslim hamîrkâr ve hademe-i sâiresinin mukaddemce bâ-irâde-i seniyye yerlerine re‘âyâ ve kendileri mahallerine i‘zâm ve bu def‘a dahi lâzımü’l-huzûr-ı nâzır-ı mûmâ-ileyh nezdine celb ve navul kalemi kuyûduna mürâca‘at ve tatbîk ve kā‘ide-i mer‘iyye-i mîrîyye ve ticârete tevfîk olunarak zikrolunan fırınların derûnlarında mevcûd zehâir ve bargir ve hatab bahâları ve tablakâr ve sâiri zimmetlerinde olan matlûbâtlarının ve anbâr-ı âmire mevcûdundan aldıkları zahîre bahâsından zahîre hazînesine ve tüccârdan aldıkları zahîre bahâsından tüccâra ve hatab ve saman ve sâir zimemâtlarının yegān yegān hesâbları rü’yet ve yerlerine şimdilik ikāmet sûretiyle re‘âyâdan habbâz ustası ik‘âd ve ikāmet ettirilmiş ve sâye-i veliyyü’n-ni‘amîde nân-ı azîz husûsunda ibâdullâha zarûret çektirilmemek husûsunun vesâili istihsâl olunmuş ise de müddet-i medîde emâneten idâresinde telefâtı mûcib ve bi’l-âhare zahîre hazînesine ve tüccâra zarar ve hasârı müstevcib olmağla zikrolunan fırınlar kadîmi vechile şehrî Müslim ve re‘âyâdan tâliblerine füruht olunarak semen-i misilleri düyûn-ı mîrîyyelerine mahsûben zahîre hazînesine teslîm ve ba‘dehû iktizâsı vechile tüccâr ve sâir kimesnelerin matlûbâtı istifâ kılınmak şartıyla zikrolunan fırınlar başka başka mezâda verilerek her biri ne mikdâra resîde olur ise taraf-ı mûmâ-ileyhden diğer tekārîr ve defâtir ile hâk-i pây-i devletlerine ifâde kılınarak ve kādı-iDârü’l-hilâfe tarafından dahi taharrî olunarak her kim ziyâde verir ise ona i‘tâ olunmak ve şimdilik mezâda verilmek istid‘âsı meâlinde nâzır-ı mûmâ-ileyhin takdîm eylediği memhûr takrîri bâlâsına bu dâ‘îlerine hitâben zahîre nâzırı efendinin işbu takrîri mûcibince zikrolunan fırınlar efendi-i mûmâ-ileyh ma‘rifetiyle başka başka mezâda verilerek tâlibleri miyânında arttırılıp ne mikdâra karâr eder ise ve her kim ziyâde verir ise ona verilmek üzre iktizâ eden bahâsı ma‘rifet-i şer‘ ve efendi-i mûmâ-ileyh ma‘rifetiyle tahsîl ve mevkūfen zahîre hazînesinde hıfz olunmak ve ba‘dehû düyûn-ı mîrîyye ve tüccâr ve sâire olan düyûnları iktizâsı vechile tanzîm kılınmak üzre zahîre hazînesine teslîmi sûretinin istihsâline mübâderet eyleyesin deyü musahhah sâdır olan fermân-ı âlîlerine imtisâlen nâzır-ı mûmâ-ileyhin vekîl-i şer‘îsi habbâzân kethudâsı Mehmed Ağa b. Ali meclis-i şer‘-i münîrde Şehrî Ohannes v. Asvador ve Yani v. Andon ve Aleksan v. Haçador ve Yorgi v. Manol ve Tavit v. Atam ve Kostandi v. Nikola ve Artin v. Noradik nâm zimmîler muvâcehelerinde zikrolunan fırınlardan İstanbul’da Deniz Hamamı nâm mahâlde vâki‘ beş horoslu bir kıt‘a habbâz fırını derûnunda mevcûde beyne’l-esnâf gedik ta‘bîr olunur yirmi re’s bargir ve sâir âlât-ı lâzımeye bi’l-iştirâk mâlikleri olan Arnavud tâifesinden ma‘lûmü’l-esâmî kesân bundan akdem ber-vech-i muharrer bâ-irâde-i seniyye vilâyetlerine i‘zâm ve der-dest olan defter mantûkunca merkūmûnun cânib-i mîrîye dokuz bin üç yüz seksen sekiz guruş ve tüccâra on dört bin beş yüz kırk guruş deynleri olup sâdır olan fermân-ı âlî mûcibince bey‘i lâzım gelmeğin zikrolunan gediğin lede’l-müzâyede iki re’s bargiri müşterûn-ı mersûmûndan Ohannes ve bir bargiri Yani ve iki bargiri Aleksan ve iki bargiri Yorgi ve beş bargiri Davit ve iki bargiri Kostandi ve altı bargiri Artin zimmîlerin olmak üzre cem‘an yirmi üç bin dokuz yüz yirmi sekiz guruşda mersûmûnun üzerlerinde karâr ve ziyâde ile tâlib-i âharı olmayıp ve meblağ-ı merkūm gedik-i merkūmun el-yevm semen-i misli idüğü ihbâr olunmağla hâlâ ben zikrolunan gediği meblağ-ı merkūm yirmi üç bin dokuz yüz yirmi sekiz guruşa mesfûrûna bi’l-vekâle bey‘ ve lâyıkıyla teslîm ve semen-i mezkûrûn iki bin beş yüz guruşunu bi-kadri’l-hısas ber-vech-i peşîn ve mâ‘adâsı olan yirmi bir bin dört yüz yirmi sekiz guruşunu senevî hisselerine göre beynlerinde bi’l-iktisâm cem‘ edip yalnız cümlesi bin guruş vererek mukāssatan emsâli misillü zahîre hazînesine edâ etmek üzre ihâle eylediğimde onlar dahi ber-minvâl-i muharrer iştirâ ve tesellüm ve vech-i meşrûh üzre semen-i mezkûru hâlâ ve mukāssatan kabzına me’mûra teslîme ta‘ahhüd etmeleriyle fîmâ-ba‘d zikrolunan gedik mersûmûnun ber-vech-i muharrer tasarruflarında olmuşdur deyü ba‘de’t-takrîr ve’t-tasdîk mârrü’l-beyân gediğin kayd-ı atîki kaleminden ref‘ ü terkīn ve kendilerinin isimlerine tashîhan kayd ile yedlerine bir kıt‘a sûret i‘tâsını mersûmûn istid‘â ve istid‘âları şurût-ı nizâma muvâfık olduğunu hazır bi’l-meclis ve mazbûtü’l-esâmî nizâm ustaları ihbâr ve inhâ eyledikleri İstanbul Mahkemesi’nden huzûr. Fî 27 R sene 1242 [Beyaz Beyaz Beyaz Beyaz]