İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 215 Hüküm no: 152 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya’da bir evin yarısını tasarruf eden Zümrüd bt. Ohannes’in hissesini, diğer hissedar Sara bt. Vartan’a devrettiği Husûsla menzil taksîmi Ma‘rûz Sâdır olan fermân-ı âlîlerine imtisâlen husûs-ı âti’l-beyânı mahâllinde keşf ü taksîm ve tahrîr için cânib-i şerî‘at-i garrâdan me’zûnen irsâl olunan Kâtib es-Seyyid Ahmed Rıza Efendi dâ‘îleri [ve] hâssa mi‘mârı hulefâsından es-Seyyid Abdülkadir Nâilî ve es-Seyyid İbrahim Râşid Halîfeler ile hâmiş-i arzuhâlde muharrer defter-i vakfdan muhrec derkenâr nâtık olduğu üzre nezâret-i dâ‘îlerinde olan evkāfdan ashâb-ı hayrâtdan merhûm Mâlcızâde el-Hâc Mehmed Ağa’nın İstanbul’da Koca Mustafa Paşa kurbünde Çerâğī Hasan Mescid-i şerîfine vaz‘ eylediği minber ve mekteb-i şerîfi vakfı müsakkafâtından İstanbul’da Samatya civârında el-Hâc Hüseyin Ağa mahallesinde vâki‘ bir tarafdan ba‘zan vakf-ı âhardan Anna bt. Manas Nasrâniye menzili ve ba‘zan Pabuşçu Nikoli zimmî menzili ve bir tarafdan Kolluk zukāğı demekle meşhûr tarîk-ı âm ve bir tarafdan Sahrınçlı Şerbethâne Sûku demekle ma‘lûm kezâlik tarîk-ı âm ve taraf-ı râbi‘i yine tarîk-ı âm ile mahdûd ve tahtında bir bâb kahve dükkânını müştemil beher şehr altmış akçe icâre-i müeccelelü bir bâb menzile varıp huzûr-ı Müslimînde akd-i meclis-i şer‘-i âlî ettikde derûn-ı arzuhâlde mastûretü’l-ism mu‘arrefetü’ş-şahs Sara bt. Vartan nâm Nasrâniye meclis-i ma‘kūd-ı mezkûrda sahibe-i arzuhâl kezâlik mu‘arrefetü’ş-şahs Zümrüd bt. Ohannes nâm Nasrâniye muvâcehesinde vakf-ı mezbûrun bâ-hüccet kāimmakām-ı mütevellîsi Ali Rıza Efendi b. Abdullah ile mahalle-i mezbûre ahâlîsinden kasab Veliyüddin b. Ahmed ve Kömürcü es-Seyyid Mehmed Tahir b. Osman ve es-Seyyid Osman Ağa b. es-Seyyid Mehmed ve Câmeşurcu es-Seyyid Hüseyin Ağa b. Ali nâm kimesneler hazır oldukları hâlde işbu derûnunda akd-i meclis-i şer‘-i âlî olunan ulyâda dört bâb oda ve bir mikdâr sofa ve küfeki taşlı bir memşâ ve bir sagīr künklü ocak ve vustâda yine dört bâb oda ve bir mikdâr sofa ve küfeki taşlı bir memşâ ve bir sagīr künklü ocak ve süflâda bir sagīr harâb oda ve bir bi’r-i mâ ve bir kömürlük ve bir memşâ ve zukāk kapısını müştemil menzil-i mezkûrun nısfı benim ve nısf-ı şâyi‘-i âharı mersûme Zümrüd Nasrâniyenin bâ-temessük-i mütevellî bi’l-icâreteyn iştirâken ve şâyi‘an taht-ı tasarrufumuzda olup lâkin menzil-i mezkûr kābil-i taksîm ve her birimiz hissemiz ile intifâ‘ mümkün olmamağla menzil-i merkūm bâ-re’y-i mütevellî mi‘mârân-ı mezbûrân ma‘rifetleriyle taksîm ve her birimizin hissesi alâmât-ı fâsıla vaz‘ıyla imtiyâz olunmak murâdımdır deyü da‘vâ ettikde mersûme Zümrüd Nasrâniye dahi menzil-i merkūm müdde‘iyye-i mesfûre ile nısfiyet üzre tasarruflarında olduğunu ikrâr edip ber-vech-i muharrer taksîme râzıye olduğundan mâ‘adâ menzil-i merkūm kābil-i taksîm olup her biri hissesiyle intifâ‘ mümkün olduğunu mi‘mârân-ı mezbûrân ve ber-vech-i muharrer taksîm olunduğu sûretde cânib-i vakfa muzır olmayıp enfa‘ olduğunu mütevellî ve ahâlî-i hâzırûn-ı merkūmûndan her biri ba‘de’l-ihbâr ve’t-tasdîk evvelen menzil-i mahdûd-ı mezkûru li-ecli’t-taksîm mi‘mârân-ı mezbûrân misâha eylediklerinde terbî‘an yüz otuz üç zirâ‘ on iki parmak arsası ve yüz doksan altı buçuk zirâ‘ bi’l-cümle ebniyesi olup ebniye-i mezkûrenin mi‘mârân-ı mezbûrân takvîmleriyle beher zirâ‘ı üçer guruşdan beş yüz seksen dokuz buçuk guruş ve zikrolunan iki aded künklü ocak yirmi beş guruş ve iki aded memşânın beheri yirmi beş guruşdan elli guruş ve bi’r-i mâ yetmiş beş guruş ve arsasının dahi ahâlî-i mezbûrûnun ihbârlarıyla beher zirâ‘ı sekizer guruşdan bin altmış altı guruş ki min-haysü’l-mecmû‘ menzil-i mezkûrun arsa ve ebniyesi ve iki aded ocak ve iki memşâ ve bir bi’r-i mâ kıymetleri bin altı yüz elli beş buçuk guruşa bâliğ olduğu ba‘de’t-tahakkuk menzil-i mezkûrun sâlifü’z-zikr Kolluk zukāğı tarafından terbî‘an altmış altı zirâ‘ altı parmak dokuz yüz yetmiş yedi guruş otuz para kıymetli ulyâda iki bâb oda ve bir mikdâr sofa ve bir memşâ ve bir sagīr ocak ve vustâda kezâlik iki bâb oda ve bir mikdâr sofa ve bir memşâ ve bir sagīr ocak ve süflâda bir bi’r-i mâ ve bir kömürlük ve bir memşâ ve zukāk kapısı mersûme Sara Nasrâniye mâlından hisse-i mezkûresinden ziyâde iktizâ eden yüz elli guruşu vermek üzre mesfûre Zümrüd Nasrâniyenin nısf hisse-i mezkûresi’çün bi’t-terâzî bâ-re’y-i mütevellî ifrâz ve ta‘yîn ve bâkī mârrü’z-zikr Sahrınçlı Şerbethânesi tarafından altmış altı zirâ‘ altı parmak sekiz yüz yirmi yedi guruş otuz para kıymetli ulyâda iki bâb oda ve bir sofa ve vustâda kezâlik iki bâb oda ve bir sofa ve süflâda bir sagīr harâb oda mersûme Sara Nasrâniyenin nısf hissesi’çün kezâlik bâ-re’y-i mütevellî bi’t-terâzî ifrâz ve tahsîs ve tarafeynden her biri dahi hisse-i müfrezelerini kabz eylediklerini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘-i şerîfle meclis-i şer‘-i hatîre gelip tarafeyn ve mütevellî-i merkūm hazır oldukları hâlde tasdîklerine mukārin alâ-vukū‘ihî ba‘de’l-inhâ ve’t-takrîr mesfûre Zümrüd Nasrâniye ber-vech-i muharrer mersûme Sara Nasrâniyenin hissesine iktizâ eden ziyâde meblağ-ı merkūm yüz elli guruşu mâlından mesfûre Sara Nasrâniyeye işbu meclis-i şer‘de def‘ ü teslîm ol dahi ahz ü kabz ve istihlâk ve her biri istifâ-yı hak edip bi’l-cümle husûs-ı mezkûra ve kısmet-i mezkûrede tağrîr-i gabn müdde‘âsına ve meblağ-ı müstehlek-i merkūmun istirdâdına müte‘allika âmme-i da‘vâdan tarafeynden her biri âharın zimmetini ibrâ-i âmm-ı sahîh-i şer‘î ile ibrâ ve ıskāt ve her biri ber-vech-i muharrer âharın ibrâsını kabûl eyledikden sonra mütevellî-i hâzır-ı merkūm Ali Rıza Efendi dahi sâlifü’z-zikr Sahrınçlı Şerbethânesi tarafından nısf hisse-i müfrezeyi şehriye otuz akçe icâre-i müeccele ile mersûme Sara Nasrâniyeye ve mâ‘adâ zikrolunan Kolluk zukāğı tarafından nısf hisse-i müfrezeyi kezâlik otuz akçe icâre-i müeccele ile mesfûre Zümrüd Nasrâniyeye îcâr ve tefvîz ve her birinin ber-vech-i muharrer tasarruflarını bi’t-tevliye re’y eylediğinde onlar dahi istîcâr ve tefevvüz eyledikleri İstanbul Mahkemesi’nden huzûr. Fî 6 R sene 1242