İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 217 Hüküm no: 153 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Letâfet Kadın bt. Abdullah’ın Topkapı dahilindeki bostanı, Rukiye bt. Süleyman’a devrettiği Topkapı dâhilinde bostan ferâğı Ma‘rûz İstanbul’da Vefa Meydânı kurbünde Mollahüsrev mahallesinde sâkine Fâtıma Letâfet Kadın bt. Abdullah tarafından husûs-ı âtîde vekîl olduğu zâtını ârifân Mehmed Şâkir Ağa b. Mehmed Ârif ve es-Seyyid Ahmed İzzet Ağa b. es-Seyyid el-Hâc Mehmed nâm kimesneler şehâdetleriyle sâbit olan sahib-i arzuhâl es-Seyyid Mehmed Ataullah Efendi ibnü’l-merhûm es-Seyyid Mehmed Abdullah Efendi bi’l-ma‘iyye <> istimâ‘a me’mûr nezâret-i hazret-i şeyhülislâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi <> hafîdi fazîletlü Mehmed Ârif Efendi tarafından mürsel Kâtib Ali Efendi ma‘iyyetiyle akd olunan meclis-i şer‘-i münîrde derûn-ı arzuhâlde mezkûreti’l-ism mu‘arrefetü’z-zât Rukiye bt. Süleyman muvâcehesinde nezâret-i hazret-i müşârün-ileyhde âsûde evkāfdan el-Hâc Mustafa Efendi Vakfı’nın mütevellîsi Nefîse Hanım tarafından vekîl-i müsecceli Mehmed Derviş b. Mehmed Said hazır olduğu hâlde mezbûre Rukiye Hatun bundan akdem İstanbul’da Topkapı dâhilinde kâin vakf-ı mezbûr müsakkafâtından bâ-temessük-i mütevellî bi’l-icâreteyn mutasarrıfe olduğu ma‘lûmü’l-hudûd bir kıt‘a bostanını eşcâr-ı müsmire-i mütenevvi‘ayı müştemildir deyü kable’l-irâe müvekkilem mûmâ-ileyhâ Letâfet Kadın’a bâ-izn-i mütevellî bedel-i ma‘lûm ve makbûz mukābelesinde ferâğ etmişdi lâkin bostan-ı mezkûrda eşcâr ve sebzevâta dâir bir nesne mezrû‘ ve mağrûs [33b] olmadığını ba‘de’r-rü’ye zâhir olduğundan bi’l-vekâle red sadedinde olmuşdum el-hâletü hâzihî beynimiz ıslâh olunup ben bostan-ı mezkûru müvekkilem mûmâ-ileyhânın hüsn-i rızâ ve ihtiyârıyla bin yüz guruş bedel mukābelesinde bâ-re’y-i mütevellî yine mezbûre Rukiye Hatun’a bi’l-vekâle ferâğ ve tefvîz ve teslîm eylediğimde ol dahi tefevvüz ve kabûl ve bedel-i mezkûr bin yüz guruşu bana def‘ ü teslîm ve müvekkilem mûmâ-ileyhânın umûruna sarfla istihlâke emreylediğinde ben dahi bi’l-vekâle ahz ü kabz ve emri üzre sarfla istihlâk etmemle ferâğ-ı mezbûrda şurût-ı müfside müdde‘âsına ve bedel-i müstehlek-i merkūmun istirdâdına ve bi’l-cümle bostan-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d bostan-ı mezkûr kemâ-fi’s-sâbık mezbûre Rukiye Hatun’un dâhil-i havza-i tasarrufu olup müvekkilem mûmâ-ileyhânın alâkası kalmamışdır deyü vekîl-i mezbûr es-Seyyid Mehmed Ataullah Efendi’nin bi’l-cümle takrîr-i meşrûhunu mezbûre Rukiye Hatun tasdîk ve mütevellî vekîli merkūm dahi bostan-ı mezkûru mezbûre Rukiye Hatun’un tasarrufuna izin verdiği İstanbul Mahkemesi’nden huzûr. Fî 8 min-S sene 1242