Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 367 Hüküm no: 414 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Sinan’ın İbrahim Ağa’dan alacaklı olduğu Mahmiye-i İstanbul’da Kızıltaş mahallesinde sâkin işbu bâ‘isü’l-kitâb Mehmed Ağa b. Sinan meclis-i şer‘-i şerîf-i enverde İbrahim Ağa nâm kimesne mahzarında üzerine da‘vâ ve takrîr-i kelâm edip mezbûr İbrahim Ağa zimmetinde cihet-i deyn-i şer‘îden yüz on esedî guruş hakkım olup hattâ mezbûr İbrahim Ağa cihet-i mezkûrdan ol mikdâr deyni olduğunu ikrâr ve hat ve hatmini hâvî yedime temessük dahi verdikden sonra meblağ-ı mezbûrdan sekiz bin akçesini kendi tevkîl ve ihâlesiyle mülhak olduğu iki kıst ulûfesinden ahz u kabz edip kırk dört esedî guruşum zimmetinde bâkī kalmağın meblağ-ı mezbûru bana edâdan imtinâ‘ eder suâl olunup meblağ-ı bâkī-i mezkûrûn alıverilmesi matlûbumdur deyû deyn-i mezbûru nâtık mümzâ ve mahtûme bir kıt‘a temessük dahi ibrâz etmeğin gıbbe’s-suâl mezbûr İbrahim Ağa cevâbında fi’l-hakīka mârrü’z-zikr temessük nâtık olduğu üzre meblağ-ı mezbûrdan kabzını i‘tirâf eylediği sekiz bin akçeden mâ‘adâ kırk dört esedî guruş mezkûr Mehmed Ağa’ya zimmetinde lâzımü’l-edâ deyni olduğunu ikrâr ve i‘tirâf etmeğin alâ mûcebi i‘tirâfihî meblağ-ı mezbûr kırk dört esedî guruşu müdde‘î-i mezbûra edâ ve teslîm mezkûr İbrahim Ağa’ya tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, el-Hâc Mustafa b. Tevekkül, Mehmed b. İdris.