İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 218 Hüküm no: 154 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Markos’un, okuma-yazma öğretme ücretinden Bedros v. Kigork ve Agop v. Artin ile sulh olduğu Yazı yazmak ücretinden sulh ve ibrâ Ma‘rûz Derûn-ı arzuhâlde mezkûru’l-ism Artin v. Markos zimmî evvelen Çarşamba günü Arz Odası’nda huzûr-ı bâhirü’n-nûr-ı âsafânelerinde ve ba‘dehû bi’t-terâzî dâ‘îhânelerinde ma‘kūd meclis-i şer‘-i münîrde ashâb-ı arzuhâl Bedros v. Kigork ve Agop v. Artin zimmîler muvâcehelerinde Bogos v. Kigork zimmî hazır olduğu hâlde ben ücret ile ta‘lîm-i hat ve kırâet eder makūleden olup mersûm Bedros zimmînin bir nefer sagīr oğluna talebiyle ücret kavlinsiz bir sene yazı öğretmemle müstehık olduğum iki yüz guruş ecr-i mislimi ve mesfûr Agop zimmînin dahi iki nefer sagīr oğullarına haftada üçer buçuk guruş ücret kavliyle yirmi ay müddetde edyânımız kitâblarını okutmamla müctemi‘ olan iki yüz seksen guruşdan <> bâkī seksen buçuk guruş ecr-i müsemmâmı mersûmândan taleb ve da‘vâya tesâddî etmişdim el-hâletü hâzihî huzzâr-ı meclis tavassutuyla beynimiz te’lîf olunup ben ber-vech-i muharrer mersûm Bedros zimmîden taleb eylediğim iki yüz guruş da‘vâmdan yetmiş iki guruş ve mesfûr Agop zimmîden mutâlebe eylediğim seksen buçuk guruş müdde‘âmdan otuz altı guruş üzerlerine sulh olduğumda onlar dahi sulh-ı mezkûru kabûl ve bedel-i sulh olan cem‘an yüz sekiz guruşu işbu meclis-i şer‘de bana def‘ ü teslîm ben dahi tamamen ve kâmilen ahz ü kabz edip hâzır-ı mersûm Bogos zimmî zimmetinde vechen mine’l-vücûh hakkım ve bir gûne da‘vâ ve nizâ‘ım olmamağla bi’l-cümle husûs-ı mezkûrlara ve ziyâde ücret mutâlebesine ve sâir cemî‘ hukūk-ı şer‘iyeye müte‘allika âmme-i da‘vâdan ben mersûmân Bedros ve Agop zimmîler ile hâzır-ı mersûm Bogos zimmînin zimmetlerini onlar dahi kezâlik benim zimmetimi her birimiz ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûlle külliyen kat‘-ı nizâ‘ eyledik deyü mersûm Artin zimmînin cemî‘ takrîr-i meşrûhunu mesfûrân Bedros ve Agop zimmîler ile hâzır-ı mersûm Bogos zimmîden her biri tasdîk eyledikleri İstanbul Mahkemesi’nden huzûr. Fî 27 R sene 1242