İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 218 Hüküm no: 155 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Margarite bt. Zakar’ın, tuhafçı ve fincancı gediğini Artin v. Mardiros’a sattığı Tuhafçı ve fincâncı mahzeni mübâya‘ası Ma‘rûz Zikri âtî gedik âlâtının bâ-sûret mâlikesi Margarite bt. Zakar Nasrâniyenin zevci ve tarafından husûs-ı âtîde vekîl olduğu şahsını bilir Nişan v. Kigork ve Bogos v. Ohan nâm zimmîler şehâdetleriyle sâbit olan İstepan v. Simon zimmî meclis-i şer‘-i münîrde Artin v. Mardiros zimmî muvâcehesinde İstanbul’da İbrahim Paşa Câmi‘-i şerîfi kurbünde [defterdâr-ı] şıkk-ı evvel-i esbak-ı merhûm Çelebi Efendi konağı karşısında kâin yarım pay hisseli bir bâb tuhafçı ve fincâncı mahzeni derûnunda mevcûde gedik ta‘bîr olunur zevcem müvekkilem mersûmenin bâ-sûret müstakilleten mâlike olduğu Başmuhâsebe’de mukayyed ve mu‘teber âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin iki bin yüz elli guruş semen-i makbûza bi’l-vekâle mersûm Artin zimmîye bey‘ ve temlîk ve teslîm eylediğimde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mesfûr Artin zimmînin mülk-i müşterâsı ve hakk-ı sırfı olup müvekkilim mersûmenin asla ve kat‘a alâka ve medhali kalmamışdır deyü ba‘de’l-ikrâr ve’t-tasdîk gedik-i mezkûrun kayd-ı evveli ref‘ ve terkīn ve müşteri-i mersûm Artin zimmî ismine tashîhan kayd ile yedine sûret i‘tâsını istid‘â eyledikleri İstanbul Mahkemesi’nden huzûr. Fî 19 R sene 1242