İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 226 Hüküm no: 165 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlid Kandili gecesinde camilerin minarelerindeki kandillerin yakılmasına dair hüküm İ‘lâm-ı mevlûd-i Hazreti Rasûlü’s-Sakaleyn -sallallâhu aleyhi ve alâ âlihî ve sahbihî ecma‘în- Bâ-sahh-ı âlî İstanbul Kādısı Fazîletlü Efendi İşbu i‘lâmınız rikâb-ı hümâyûn-ı mülûkâneye lede’l-arz iktizâ edenlere tenbîh olunmak bâbında hatt-ı şerîf-i tâc-dârî şeref-yafte-i sudûr olmağla mantûk-ı münîfi icrâ eyleyesin deyü. Fî 7 Ra sene 1242 Dergâh-ı nusret-destgâh ve bârgâh-ı te’yîd-penâh hâk-i pâkine ma‘rûz-ı abd-i dâ‘î-i bî-iştibâhlarıdır ki Sinîn-i hicriye-i eşref-terîn-i evlâd-ı Âdem -sallallâhu te‘âlâ aleyhi ve alâ âlihî ve sahbihî ve sellim-’den işbu bin iki yüz kırk iki <> sâl-i zafer-fâlinin silkü’l-lü’l-i şuhûrunda münselik-i dürr-i ferîd-i şehr-i Rebî‘ülevveli gurre-i garrâsı Salı gününden mazbût olmağla Misâl-i ebr-i rahmet dehri teşrîf ettiği sâ‘at / Mecûs ateşlerin bârân-ı fazlı eyledi itfâ beyt-i mu‘ciz-beyânı mu‘arref vasf-ı şânı olan sahibü’l-livâ Muhammedü’l-Mustafa -aleyhi elfü salât aleyhi elfü selâm- Efendimiz hazretlerinin hayat-bahş-ı âlem ve inâyet-fermâ-yı ümem oldukları şeb-i şeref-meşreb-i mâh-ı mübârek-i merkūmun on ikinci Sebt gecesine tesâdüf etmekle de’b-i dîrîn-i Devlet-i Aliyye-i Muhammediye -edâmellâhu te‘âlâ hâmîhâ ilâ-yevmi’l-kıyâme- üzre leyle-i müteberreke-i mezkûrede minârât-ı cevâmi‘ ve me‘âbid-i iş‘âl-i kanâdîl-i kamer-fitîl ile numûne-nümâ-yı envâr-ı âbid kılınmak bâbında fermân-ı âlîleri sudûru iktizâ eylediği İstanbul Mahkemesi’nden âsitân-ı felek-bünyânlarına i‘lâm olundu bâkī emr u fermân hazret-i veliyyü’l-emr ve’l-ihsânındır. Fi’l-yevmi’r-râbi‘ min-şehri’ş-şerîfi’l-mezkûr li-seneti’l-müstahseneti’l-muharrere