İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 228 Hüküm no: 167 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Tanaş’ın, kasab gediği hisselerinden bir kısmını Nikola v. Yani ve Hristo v. Yorgi’ye devrettiği Kasab Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -tâbe serâhu- hazretleri evkāf-ı celîlelerinden Yedikule hâricinde kâin gayrı-ez selhhâne-i mîrî on aded ganem selhhânelerinden dördüncü selhhâneye merbût kasab dükkânlarından Bebek karyesinde bir bâb ve Rumelihisarı karyesinde iki bâb ve Arnabud karyesinde bir bâb ki cem‘an dört bâb kasab dükkânları gediklerinin nısf hisse-i şâyi‘alarıyla beşinci selhhâneye merbût Kuruçeşme karyesinde bir bâb kasab dükkânı gediğinin nısf ve sümün hisse-i şâyi‘asına iki kıt‘a temessük ile mutasarrıf olan Kosta v. Tanaş zimmî meclis-i şer‘-i münîrde Nikola v. Yani ve Hristo v. Yorgi zimmîler muvâcehelerinde kasablar kethudâsı el-Hâc Hasan Ağa hazır olduğu hâlde takrîr-i kelâm edip ben ber-vech-i muharrer mutasarrıf olduğum hisse-i şâyi‘a-i mezkûrelerimin her birinin nısf-ı şâyi‘lerini uhdemde ibkā ve nısf-ı şâyi‘-i âharlarının sülüsânını mersûm Nikola zimmîye ve sülüseyi dahi mersûm Hristo zimmîye hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî ferâğ ve tefvîz ve vech-i lâyıkı üzre teslîm eylediğimde onlar dahi tefevvüz ve kabûl etmeleriyle fîmâ-ba‘d zikrolunan nısf an-nısf hisse-i şâyi‘a-i mezkûrelerde benim alâkam kalmayıp sülüsânı mersûm Nikola zimmînin ve sülüseyi dahi mersûm Hristo zimmînin dâhil-i havza-i tasarrufları ve hakk-ı müfevvazları olmuşdur deyü takrîrini mesfûrân tasdîk etmeleriyle bu sûretde zikrolunan dört bâb dükkân gediklerinin rub‘-ı şâyi‘leri ve zikrolunan bir bâb dükkân gediğinin rubu‘ ve nısf-ı sümün-i şâyi‘i fâriğ-i mersûm Kosta zimmînin temessüklerinden ifrâz ve sülüsânı mersûm Nikola zimmî ve sülüseyi dahi mersûm Hristo zimmî uhdelerinde defter-i vakf-ı şerîfe kayd ile yedlerine başka başka temessük i‘tâsını istid‘â eyledikleri İstanbul Mahkemesi’nden huzûr. Fî 20 min-Muharrem sene 1242 [Beyaz]