İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 229 Hüküm no: 168 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşı-yı Kebir’de Abacılar’da yangından zarar gören sokak kemerlerinin, kapamacı ve fesçi esnafı tarafından tamir ettirildiği Çarşıda kapamacı ve fesçi dükkânları keşfi Ma‘rûz Sâdır olan fermân-ı âlîlerine imtisâlen savb-ı şer‘-i enverden irsâl olunan baş kâtib mevlânâ İbrahim Ârif Efendi ve Haremeyn-i şerîfeyn müfettişi olup İstanbul pâyesiyle tekrîm buyrulan zâde-i Emin Paşazâde fazîletlü mîr Abdülkadir Efendi tarafından mürsel Kâtib es-Seyyid İbrahim Efendi hâssa mi‘mârı hulefâsından es-Seyyid Ali Necib ve es-Seyyid İsmail Kemâlî Halîfeler ile İstanbul’da Çarşı-yı Kebîr’de Abacılardan Du‘â Meydânı’na <> gidince sol tarafda kâin dört aded kapamacılar sûkları köşelerinde kâin Dârü’s-sa‘âdeti’ş-şerîfe ağası hazretleri nezâretlerinde olan evkāfdan İstanbul’da vâki‘ Ayasofya-i Kebîr Câmi‘-i şerîfi ve nezâret-i dâ‘îlerinde olan evkāfdan ashâb-ı hayrâtdan Debbağzâde el-Hâc Hasan ve Kürkçübaşı Ahmed Şemseddin Evkāfı müsakkafâtlarından on altı bâb dekâkîne varıp cerîdede mazbûtü’l-esâmî kimesneler huzûrlarında ba‘de akdi’l-meclis ashâb-ı arzuhâl fesçi esnâfının İstanbul kethudâsı Mehmed Said b. Süleyman ve Galata kethudâsı el-Hâc Süleyman b. Mehmed Said ve esnâfdan Süleyman b. el-Hâc Yusuf ve diğer Süleyman b. Osman ve el-Hâc Abdurrahman b. el-Hâc Mehmed Yessir? ve Said b. Şa‘ban nâm kimesneler ve sâirleri meclis-i ma‘kūd-ı mezkûrda derûn-ı arzuhâlde Çarşı-yı Kebîr’de vâki‘ kapamacı esnâfının ustabaşısı Setrak v. Andon ve ustalarından Uncuoğlu Karabet v. Kalos ve Karabet v. Serope ve Artin v. Andon ve sâirleri muvâcehelerinde mârrü’z-zikr Ayasofya-i Kebîr Vakfı’nın mütevellîsi hâlâ kâtib-i hazret-i ağa-yı Dârü’s-sa‘âdeti’ş-şerîfe Ahmed Râşid Efendi tarafından mürsel vekîli câbî-i Pazar-ı Gelincik es-Seyyid Mehmed Ârif Efendi b. İsmail ve mârrü’l-beyân Kürkçübaşı Ahmed Şemseddin Vakfı’nın mütevelliyesi Hâce Zeliha Hatun bt. Mustafa tarafından mürsel vekîli câbî-i vakf el-Hâc Mehmed Azîz Efendi b. el-Hâc Mustafa ile fesçi esnâfından Ahmed b. Salih b. Yunus ve kapamacı esnâfından Sakaoğlu Artin v. Toma zimmî hazır oldukları hâlde bundan akdem bi-kazâillâhi te‘âlâ vukū‘ bulan harîkde işbu mu‘âyene olunan Abacılar tarîk-ı caddesiyle tarafeyninde kâin yedi aded zukākların kârgirleri münhedim olup <> tecdîde muhtâc ve bizlerin dükkânları tarîk-ı caddede olduğundan tarîk-ı mezkûrun kemerlerini binâ ve inşâya bed’ eylediğimiz hînde kapamacı esnâfı mersûmûnun dört aded zukāklarda elli beş bâb dekâkîni olup tarîk-ı caddenin kemerine sarf için imdâ[di]ye olarak bizlere mâllarından teberru‘an beher dükkân için kırkar guruşdan cem‘an iki bin iki yüz guruş verip bizler dahi tamamen ahz ü kabz ve vech-i meşrûh üzre harc ü sarf edip ancak bu def‘a dört aded zukāklardan hâzır-ı mezbûr Fesçi Ahmed’in dükkânı verâsında kâin hâzır-ı mesfûr Sakaoğlu Artin zimmînin dükkânı kemeri tahtına vaz‘ olunacak bir aded taş sütun çam çarşı on dört parmak ve mâ‘adâ mahallere vaz‘ olunacak beş aded taş sütun mevcûdu misillü olmak üzre inşâya bizler ta‘ahhüd eylediğimizde kapamacı esnâfı merkūmûn dahi sâlifü’l-beyân altı aded taş sütunların vaz‘ına ne mikdâr akçe sarf eder isek ba‘de’l-keşf nısflarını mâllarından bizlere vermek üzre müte‘ahhidler olup bu vechile kat‘-ı nizâ‘ eyledik dediklerini kapamacı esnâfı mersûmûn ile hâzırân-ı merkūmândan her biri tasdîk eylediklerini kâtibân-ı mezbûrân mahâllinde tahrîr ve ma‘an meb‘ûs ümenâ-i şer‘le meclis-i şer‘a gelip tarafeyn hazır oldukları hâlde alâ-vukū‘ihî inhâ ve takrîr ve tarafeyn ile hâzıran-ı mezbûrândan her biri tasdîk eyledikleri İstanbul Mahkemesi’nden huzûr. Fî-gurreti R sene 1242 Nüshateyn