İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 230 Hüküm no: 169 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun bt. Hasan’ın, Hâfız Ahmed b. Mustafa’ya 715 guruş borcunu eda etmesi gerektiği 715 guruş ile mukābelesinde olan menzili geri red ve ferâğa tenbîh Ma‘rûz İşbu târihden iki sene mukaddem vefât eden Şerife Zeyneb Hatun bt. Mehmed’in sadrî kebîr oğlu sahib-i arzuhâl A‘mâ es-Seyyid Hâfız Ahmed b. es-Seyyid Mustafa meclis-i şer‘-i münîrde derûn-ı arzuhâlde mezkûreti’l-ism Şerife Fâtıma bt. Hasan nâm hatun muvâcehesinde nezâret-i dâ‘îlerinde olan evkāfdan İstanbul’da Çarşamba Pazarı civârında Mehmed Ağa Câmi‘-i şerîfi kurbünde vâki‘ Derviş Ali mahallesi Avârız Vakfı’nın mütevellîsi Kısmet-i Belediye mahkemesi ketebesinden es-Seyyid Mehmed Râcih Efendi b. Hâfız Osman hazır olduğu hâlde vakf-ı mezbûr müsakkafâtından mahalle-i mezbûrede kâin şehriye otuz akçe icâre-i müecceleli ma‘lûmü’l-hudûd ve’l-müştemilât bir bâb menzilin dört sehmi i‘tibârıyla üç sehm hisse-i şâyi‘ası mezbûre Şerife Fâtıma Hatun’un bir sehm hisse-i şâyi‘ası dahi zevci gāib ani’l-meclis Mehmed Hâşim nâm kimesnenin bâ-temessük-i mütevellî bi’l-icâreteyn iştirâken ve şâyi‘an taht-ı tasarruflarında iken mezbûre Şerife Fâtıma Hatun vâlidem mevrûsem müteveffât-ı mezbûrenin hayatında yedinden ve mâlından karz aldığı yedi yüz on beş guruş deyni mukābelesinde biz ne zaman edâ-i deyn eder ise[k] geri red ve ferâğ olunmak şartıyla bâ-re’y-i mütevellî bin iki yüz otuz dokuz senesi Recebi’l-ferdinin dokuzuncu günü vâlidem mezbûreye vefâen ferâğ ve tefvîz eylediğinde ol dahi şart-ı mezkûr ile tefevvüz ve kabûl ettikden sonra mezbûre Şerife Fâtıma Hatun deyn-i mezkûru edâ ile menzil-i merkūmu tahlîs etmeksizin vâlidem mezbûre fevt olup meblağ-ı mezkûr hasran bana mevrûs olmağla meblağ-ı mezkûr yedi yüz on beş guruş ile menzil-i mezkûrun her ne kadar îcâr ve tahliye ve teslîm dahi bulunmamış ise de mücerred vefâen vâlidem mezbûrenin üzerinde olup içinde mezbûre Şerife Fâtıma Hatun ile müştereki zevci gāib-i mezbûr sâkinler olduklarına binâen târih-i mezkûrdan bu âna kadar işlemiş kirâsını bana edâ ile menzil-i mezkûru bâ-re’y-i mütevellî geri ahza mezbûre Şerife Fâtıma Hatun’a tenbîh olunmak matlûbumdur deyü da‘vâ ettikde ol dahi cevâbında menzili târih-i mezkûrda ol mikdâr guruş mukābelesinde mezbûre Şerife Zeyneb Hatun’a vefâen ferâğını ikrâr edip lâkin ben mezbûreden ancak dört yüz guruş karz alıp zimmetimde deyn-i <> sahîhim olmağla mâ‘adâ üç yüz on beş guruşu bilâ-devr zam ribâdır deyü eylediği murâbaha müdde‘âsını mezbûr es-Seyyid Hâfız Ahmed inkâr etmeğin bu sûretde ber-muktezâ-yı şer‘-i şerîf bu mertebe ile kirâ lâzım gelmeyip ancak murâbaha da‘vâsı isbâta muhtâc idüğü tarafeyne tefhîm olundukda mezbûre Şerife Fâtıma Hatun ber-vech-i muharrer zamm-ı ribâ da‘vâsını isbâta kādire olamayıp talebiyle mezbûr es-Seyyid Hâfız Ahmed’e bi’l-muvâcehe vech-i şer‘î üzre adem-i ilme yemîn verilmeğin mûcibince mezbûr es-Seyyid Hâfız Ahmed kirâ da‘vâsıyla ve mezbûre Şerife Fâtıma Hatun dahi ribâ müdde‘âsıyla her biri âhara bî-vech ve bilâ-beyyine mu‘ârazadan ba‘de’l-men‘ alâ-mûcib-i ikrârihâ deyn-i mezkûr yedi yüz on beş guruşu ırsen mezbûr es-Seyyid Hâfız Ahmed’e edâ ile menzil-i mezkûru bâ-re’y-i mütevellî geri ahza mezbûre Şerife Fâtıma Hatun’a tenbîh olunduğu İstanbul Mahkemesi’nden huzûr. Fî 19 min-Ca [Cemâziyelevvel] sene 1242 [Beyaz Beyaz]