İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 232 Hüküm no: 171 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Agop’un, Sultan Odaları’ndaki iki odayı Mehmed İzzet Ağa b. Ali’ye sattığı Sultân Odaları’nda iki bâb oda gediği mübâya‘ası Kuyumcu esnâfından Papasoğlu Kirkor v. Agop zimmî meclis-i şer‘-i münîrde Mehmed İzzet Ağa b. el-Hâc Ali muvâcehesinde takrîr-i kelâm edip İstanbul’da Mahmud Paşa Câmi‘-i şerîfi kurbünde müteveffâ Rüstem Paşa Vakfı müsakkafâtından Sultân Odaları demekle meşhûr bir bâb hân derûnunda fevkānîsinde sol tarafda dokuzuncu ve onuncu iki bâb odalar derûnlarında mevcûde gedik ta‘bîr olunur bâ-sûret şirâen <> mâlik olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin merkūm Mehmed İzzet Ağa’ya bin iki yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d zikrolunan iki bâb oda gediklerinde benim kat‘a alâkam kalmayıp merkūm Mehmed İzzet Ağa’nın mülk-i müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk gedik-i mezkûrların kayd-ı evveli ref‘ ve terkīn ve müşteri-i merkūm Mehmed İzzet Ağa ismine tashîhan kayd ile kaleminden yedine sûret i‘tâ buyurulmasını istid‘â eyledikleri İstanbul Mahkemesi’nden huzûr. Fî 14 min-Ca sene 1242