İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 233 Hüküm no: 173 Orijinal metin no: [36a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli esnaf gruplarından bazı kimselerin, Bakkal Anaştaş v. Avram’dan 4128 buçuk guruş alacağı olduğu 4128 buçuk guruş hüküm Ma‘rûz Âsitâne-i aliyyede vâki‘ zeytinyağcı esnâfından olup ber-vech-i âtî beş yüz yirmi dört buçuk guruş iddi‘â eden Hâfız Mehmed Efendi b. el-Hâc Süleyman ve iki yüz kırk dört guruş iddi‘â eden Kahveci-zâde es-Seyyid Hasan Ağa b. Mustafa ve altı yüz yetmiş iki guruş iddi‘â eden Mehmed b. Mustafa ve üç yüz iki guruş iddi‘â eden Yağcı es-Seyyid Memiş Ağa b. Ömer ve altı yüz üç guruş iddi‘â eden Yağcı Molla Abdullah b. el-Hâc Mustafa nâm kimesneler ile üç yüz on dört guruş iddi‘â eden Yağcı İstirati v. Yako zimmî asâleten ve üç yüz kırk guruş iddi‘â eden Vefâlızâde es-Seyyid el-Hâc Hasan Ağa b. Ahmed nâm kimesne dahi kendi nefsinden asâleten ve dört yüz otuz yedi guruş iddi‘â eden Galatalı Mehmed Sâdık Ağa b. Hasan ve otuz yedi guruş iddi‘â eden Tuzcu İbrahim Ağa b. Ömer ve yirmi altı guruş iddi‘â eden Pirinççi Mustafa Ağa b. Ebîbekir ve kırk guruş iddi‘â eden Odunkapılı el-Hâc Ebûbekir Ağa b. Mehmed ve yüz otuz yedi guruş iddi‘â eden Kapan-ı dakīkli Pirinççi Mehmed b. Abdullah ve otuz yedi guruş iddi‘â eden Pekmezci Ali Yazıcı b. Hüseyin nâm kimesneler ile yüz on iki guruş iddi‘â eden Ayazmalı Aci Foti v. Yani ve üç yüz üç guruş iddi‘â eden Vasilaki v. Dimitri zimmîler taraflarından husûs-ı âtîde vekîlleri olduğu Mehmed b. Mustafa ve Hâfız Mehmed Efendi b. el-Hâc Süleyman nâm kimesneler şehâdetleriyle sâbit olmağla vekâleten her biri meclis-i şer‘-i münîrde Bakkal Anaştaş v. Avram zimmî muvâcehesinde mersûm Anaştaş zimmî zimmetinde bizim ve müvekkilûn-ı merkūmûnun yedimizden ve mâlımızdan iştirâ ve kabz eylediği vezn ve fiyâtı beynimizde ma‘lûm zeytinyağı ve sâde yağı ve sabun ve pirinç ve sâir bu makūle bakkāl metâ‘ı esmânından ba‘de külli’l-hesâb sahhu’l-bâkī cem‘an dört bin yüz yirmi sekiz buçuk guruş alacak hakkımız olmağla bi’l-asâle ve bi’l-vekâle meblağ-ı mecmû‘-ı mezkûru mersûmdan taleb ederiz deyü da‘vâ ol dahi ber-vech-i muharrer ikrâr ve i‘tirâf etmeğin alâ-mûcib-i i‘tirâfihî meblağ-ı mecmû‘-ı merkūm dört bin yüz yirmi sekiz buçuk guruşun asîl ve vekîl-i merkūmûna ber-vech-i bâlâ edâsıyla mersûm Anaştaş zimmî ilzâm olunduğu İstanbul Mahkemesi’nden huzûr. Fî 28 min-Rebî‘ülâhir sene 1242 [Beyaz]