İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 234 Hüküm no: 174 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eftim v. Yani’nin, Ayasofya’daki kasab gediğini Mehmed Ağa b. Hüseyin’e devrettiği Kasab ferâğı Ma‘rûz Hudâvendigâr-ı esbak cennet-mekân firdevs-âşiyân merhûm Sultân Abdülhamid Han -tâbe serâhu- hazretlerinin evkāf-ı şerîfeleri mülhakātından İstanbul hısnı ebvâbından Yedikule kapısı hâricinde kâin gayrı-ez selhhâne-i mîrî on aded ganem selhhânelerinden yedinci selhhâneye merbût kasab dükkânlarından İstanbul’da Ayasofya’da nalband dibinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin sülüs-i an-nısf hissesine bâ-re’y-i mütevellî mutasarrıf olan Kasab Eftim v. Yani zimmî meclis-i şer‘-i enverde Yedikule kasablar kethudâsı el-Hâc Hasan Ağa ve sâir kasab ustaları hazır oldukları hâlde mârrü’z-zikr Yedikule kasabları ustalarından Mehmed Ağa b. Hüseyin nâm kimesne muvâcehesinde zikrolunan kasab dükkânı gedik âlâtında ber-vech-i muharrer bâ-re’y-i mütevellî mutasarrıf olduğum sülüs-i an-nısf hissemi hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-ma‘rifet-i mütevellî mezbûr Mehmed Ağa’ya ferâğ ve tefvîz eylediğimde ol dahi tefevvüz ve tesellüm ve kabz ve kabûl ve hisse-i tevzî‘ini kethudâ ve ustalarıyla tamamen almağa ta‘ahhüd etmekle fîmâ-ba‘d sâlifü’z-zikr sülüs-i an-nısf hisse-i şâyi‘ada benim kat‘a alâka ve medhalim kalmayıp merkūm Mehmed Ağa’nın dâhil-i havza-i tasarrufu ve hakk-ı müfevvazı olmuşdur deyü ba‘de’l-ikrâr ve’t-tasdîk âlât-ı lâzıme-i mezkûrenin ber-vech-i muharrer sülüs-i an-nısf hissesi mersûm Eftim zimmînin ferâğından mezbûr Mehmed Ağa üzerine tahrîr ve atîk temessükünden ifrâz ile şerh verilerek zabt ve tasarrufu’çün yedine taraf-ı vakıfdan müceddeden temessük i‘tâ buyurulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 9 min-Ca sene 1242