İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 235 Hüküm no: 175 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eftim v. Yani’nin, Arslan Han civarındaki kasab gediğini Mehmed Ağa b. Hüseyin’e devrettiği Kasab ferâğı Ma‘rûz Hudâvendigâr-ı esbak cennet-mekân adn-âşiyân merhûm ve mağfiret-nişân Sultân Abdülhamid Han -tâbe serâhu- hazretlerinin evkāf-ı şerîfeleri mülhakātından Yedikule hâricinde kâin gayrı-ez selhhâne-i mîrî on aded ganem selhhânelerinden üçüncü selhhâneye merbût kasab dükkânlarından İstanbul’da Arslanhâne kurbünde sebzeci ittisâlinde köşe başında vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin sülüs hissesine mutasarrıf olan kasab Eftim v. Yani nâm zimmî meclis-i şer‘-i hatîrde Yedikule kassâbânı kethudâsı el-Hâc Hasan Ağa b. el-Hâc Osman ile sâir kasab ustaları hazır oldukları hâlde mârrü’z-zikr Yedikule kassâbânı ustalarından Mehmed Ağa b. Hüseyin muvâcehesinde zikrolunan kasab dükkânı gedik âlât-ı lâzımesinde ber-vech-i muharrer bâ-re’y-i mütevellî mutasarrıf olduğum sülüs hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-ma‘rifet-i mütevellî merkūm Mehmed Ağa’ya ferâğ ve tefvîz ve teslîm eylediğimde ol dahi tefevvüz ve tesellüm ve kabz ve kabûl ve hisse-i tevzî‘ini kethudâ ve ustalarıyla tamamen almağa ta‘ahhüd etmekle fîmâ-ba‘d sülüs hisse-i şâyi‘a-i mezkûrede benim kat‘a alâka ve medhalim kalmayıp mezbûr Mehmed Ağa’nın dâhil-i havza-i tasarrufu ve hakk-ı müfevvazı olmuşdur deyü ba‘de’l-ikrâr ve’t-tasdîk âlât-ı lâzıme-i mezkûrenin sülüs hisse-i şâyi‘ası mesfûr Eftim zimmînin ferâğından merkūm Mehmed Ağa üzerine tahrîr ve atîk temessükünden ifrâzıyla şerh verilerek zabt ve tasarrufu’çün taraf-ı vakıfdan müceddeden temessük i‘tâ buyurulmak iktizâ eylediği İstanbul Mahkemesi’nden huzûr. Fî 9 Ca sene 1242