İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 236 Hüküm no: 176 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Ahmed’in 35 guruşu ile bazı eşyalarına el koyan Ebubekir b. Abdullah’a, bunları iadeye tenbih 35 guruş ile eşyâ teslîmine tenbîh Ma‘rûz Sahib-i arzuhâl Tatar Pazarcıklı hidmetkâr [hizmetkâr] Salih b. Ahmed nâm kimesne meclis-i şer‘de hâlâ Mehterhâne-i âmire nâzırı sa‘âdetlü İrfanzâde el-Hâc Mehmed Ârif Efendi’nin kāyını derûn-ı arzuhâlde mezkûru’l-ism Ali Bey b. Mehmed tarafından husûs-ı âtîde vekîl olduğu es-Seyyid Süleyman Ağa b. es-Seyyid Hasan ve es-Seyyid Mehmed Şükrü Ağa b. es-Seyyid Mehmed nâm kimesneler şehâdetleriyle ber-nehc-i şer‘î sâbit olan el-Hâc Ebûbekir Ağa b. Abdullah muvâcehesinde ben bundan akdem mâhiye yirmi dört guruş ve sâliye altmış guruş ücret mukāvelesiyle müvekkil-i mezbûr Ali Bey’e iki sene hidmet [hizmet] ve bu def‘a mufârakat eylediğimde sâliyemden ancak yedi aya isâbet eden otuz beş guruş hakkımı ve mukaddemâ benim’çün kendi mâlıyla âhardan iştirâ ve bana mâhiye ve ilbâs eylediği iki takım ta‘bîr olunur iki İngiliz şalı ve iki zeytûnî salta marka ve iki çift tozluk ve iki şalvarımı yed ve zimmetinde alıkoyup vermemekle meblağ-ı mezkûr otuz beş guruş ile eşyâ-i muharrere-i mezkûreyi aynen bana edâ ve teslîme müvekkil-i mîr-i mezbûra izâfetle vekîl-i merkūmdan taleb ederim deyü da‘vâ ol dahi kazıyye minvâl-i meşrûh üzre olduğunu bi’l-vekâle ikrâr ve i‘tirâf etmeğin alâ-mûcib-i i‘tirâfihî meblağ-ı mezkûr otuz beş guruş ile eşyâ-i muharrere-i mezkûreyi bi-a‘yânihâ müdde‘î-i mezbûr Salih’e edâ ve teslîme müvekkil-i mîr-i mezbûra izâfetle vekîl-i merkūm el-Hâc Ebûbekir Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 15 min-Ca sene 1242