İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 236 Hüküm no: 177 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevhide bt. Mehmed’in, Emin Bey mahallesindeki bir aded vakıf evin yarısından fazlasına tasarruf edemeyeceği Vakıf menzil nizâ‘ı Ma‘rûz Sahibe-i arzuhâl mu‘arrefetü’z-zât Tevhide bt. Mehmed nâm hatun meclis-i şer‘-i münîrde zikri âtî vakıf menzil arsasının nısf-ı şâyi‘ine bâ-temessük-i mütevellî tefevvüzan bi’l-icâreteyn mutasarrıfe olup ol vechile vaz‘-ı yedi mütehakkık olan kezâlik zâtı mu‘arrefe Havva bt. Halil nâm hatun muvâcehesinde nezâret-i dâ‘îlerinde olan evkāfdan ashâb-ı hayrâtdan reisülküttâb-ı esbak-ı merhûm Şâmîzâde Mehmed Efendi Vakfı’nın evlâdiyet ve meşrûtiyyet üzre bi’l-iştirâk mütevellîleri Cemile Hanım ve hemşîresi Fâtımatüzzehrâ Hanım bt. Hâcegân-ı Dîvân-ı hümâyûndan İbrahim Reşid Efendi taraflarından vekîl-i müsbet-i şer‘îleri mûmâ-ileyhâ Cemile Hanım’ın zevci Hâcegân-ı Dîvân-ı hümâyûndan derûn-ı arzuhâlde mezkûru’l-ism Mehmed Emin Efendi hazır olduğu hâlde vakf-ı mezkûr müsakkafâtından İstanbul’da Sultân Bâyezid-i Velî Han -tâbe serâhu- Hazretleri Câmi‘-i şerîfi kurbünde Emin Bey mahallesinde kâin beher şehr kırkar akçe icâre-i müecceleli ma‘lûmü’l-hudûd ve’l-müştemilât bir bâb menzile mutasarrıfe olan vâlidem Fâtıma bt. Mehmed nâm hatun eğerçi işbu yedimde olan mütevellî temessükünde zikr ve tafsîl olunduğu üzre mutasarrıfe olduğu menzil-i mezkûru otuz dokuz senesi Saferü’l-hayr gurresinde gāibân ani’l-meclis Osman Ağa b. Mustafa ve kāyınvâlidesi Kezban bt. Abdullah nısfiyet üzre bâ-re’y-i mütevellî ferâğ ve tefvîz ve teslîm edip onlar dahi ba‘de’t-tefevvüz ve’l-kabûl üç sene mürûrunda ber-vech-i muharrer nısfiyet üzre mutasarrıflar oldukları menzil-i mezkûru sahibe-i evveli vâlidem mezbûre Fâtıma Hatun ile zevcim Tatar Yahya b. Mahmud nâm kimesneye nısfiyet üzre bâ-re’y-i mütevellî ferâğ ve tefvîz ve teslîm onlar dahi tefevvüz ve kabûl etmeleriyle ol vechile menzil-i mezkûrun nısfı vâlidem mezbûre Fâtıma Hatun’un ve nısf-ı âharı dahi zevcim mezbûr Tatar Yahya’nın tasarruflarında iken vâlidem mezbûre Fâtıma Hatun fevt olup nısf hisse-i mezkûresi âdiyen bana müntakıl ve zevcim mezbûr Tatar Yahya dahi bilâ-veled fevt olup nısf hisse-i mezkûresi mahlûl ve cânib-i vakf-ı şerîfe âid ve râci‘ oldukda ben mütevelliye-i mûmâ-ileyhimâya varıp hissedârı olduğumdan zevcim müteveffâ-yı mezbûr [37a] Tatar Yahya’nın ber-vech-i muharrer tasarrufunda olan nısf hisse-i şâyi‘a olduğunu ikrâr ve i‘tirâf ederek mahlûlünden ehven-i mu‘accele ile istîcâr eylediğimde lede’l-müzâyede Nâile bt. Halil nâm hatun ziyâde mu‘accele ile tâlibe olmağla mütevelliye-i mûmâ-ileyhimâ dahi nısf hisse-i münhale-i mezkûreyi bi’t-tevliye mezbûre Nâile Hatun’a îcâr ve vech-i lâyıkı üzre teslîm ol dahi istîcâr ve tesellüm edip tasarrufunda iken menzil-i mezkûr harîkde muhterik oldukdan sonra mezbûre Nâile Hatun arsasından mutasarrıfe olduğu nısf hisse-i şâyi‘asını benim muvâcehemde bâ-re’y-i mütevellî mezbûre Havva Hatun’a ferâğ ve tefvîz ol dahi tefevvüz ve kabûl etmişdi lâkin mecmû‘-ı menzil mukaddemâ uhdesinde iken rubu‘unu dâmadıma vereceğim dediği vâlidemin lisânından mesmû‘um olmuş ise de bu def‘a mahlûlden bana verilir ise nizâ‘ etmeyip sükût edecek idim ancak bana verilmeyip âhara verildiğinden nısfının mahlûliyeti tutmamış öyle olıcak mücerred vâlidem mezbûrenin mukaddemâ lisânından işittiğim vechile yalnız rubu‘u mahlûl olsun rubu‘-ı âharını isterim deyü takrîr-i meşrûhu üzre tesâddî eylediği da‘vâsında evvelen vâlidem mezbûre Fâtıma Hatun mecmû‘-ı menzili izn-i mütevellî ile mezbûrân Osman Ağa ve Kezban Hatun’a fâriğa olup ba‘dehû mutasarrıfları mezbûrân Osman Ağa ve Kezban Hatun dahi mezbûre Fâtıma Hatun ile mezbûr Yahya’ya bâ-izn-i mütevellî nısfiyet üzre fâriğler olduklarına binâen mezbûre Fâtıma Hatun’un uhdesinde bir nesne yoğiken dâmadıma rubu‘unu verecek idim demesinin kat‘a fâidesi olmadığından mâ‘adâ bu def‘a mahlûlden nısf hisse-i mezkûreyi bi’l-ikrâr istîcâr etmiş iken rubu‘ menzili mutâlebeye şer‘an kādire olmadığı müdde‘iyye-i mezbûre Tevhide Hatun’a tefhîm olunmağın bu sûretde menzil-i mezkûru mezbûretân Tevhide ve Havva Hatunların nısfiyet üzre zabt ve tasarrufları iktizâ eylediği İstanbul Mahkemesi’nden huzûr. Fî 21 min-Ca sene 1242 İhrâc-şüd fî 29 S sene [12]49