İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 245 Hüküm no: 184 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in, Tavuk Hanı’ndaki dükkânında kahvecilik dışında başka bir iş yapmasına müsaade edildiği Tavuk Hânı derûnunda kahve dükkânını âhar dükkân yapmağa ta‘ahhüd Ma‘rûz Hâcegân-ı Dîvân-ı hümâyûndan Lütfullah Efendi kāyınvâlidesi Âişe bt. Süleyman nâm hatun tarafından husûs-ı âtîde vekîl olduğu zâtını ârifân Osman Ağa b. Abdullah ve es-Seyyid Abdi Ağa b. es-Seyyid Mustafa nâm kimesneler şehâdetleriyle sâbit olan Eyüb’de Şah Sultân Câmi‘-i şerîfi imâmı Hâfız Hüseyin Efendi b. Hasan Çarşamba günü Arz Odası’nda huzûr-ı lâmi‘u’n-nûr-ı düstûrânelerinde bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi hazır olduğu hâlde akd olunan meclis-i şer‘-i münîrde derûn-ı arzuhâlde ismi mezkûr es-Seyyid Mehmed b. Ahmed muvâcehesinde cennet-mekân firdevs-âşiyân merhûm ve mağfiret-nişân Şehzâde Sultân Mehmed -tâbe serâhu- Hazretleri Vakfı’nın mütevellîsi Ahmed Şemseddin Efendi b. Süleyman tarafından mürsel kâtib-i vakf Mehmed Said Efendi b. Hasan hazır olduğu hâlde hâmiş-i arzuhâlde mastûr defter-i vakfdan muhrec derkenâr nâtık olduğu üzre vakf-ı müşârün-ileyh müstagallâtından İstanbul’da müşârün-ileyhin imâret-i âmireleri [38b] karşısında kâin Tavuk Hânı demekle meşhûr müvekkilem mezbûrenin mutasarrıfe olduğu bir kıt‘a hân derûnunda vâki‘ bir bâb kahve dükkânında mezbûr es-Seyyid Mehmed müste’ciren sâkin iken bundan akdemce bâ-fermân-ı âlî mecmû‘-ı kahve dükkânları sedd ü bend olunup müvekkilem mezbûre dahi fesh-i akd-i icâre etmekle ol vechile mezbûr es-Seyyid Mehmed’in alâkası kalmamış iken derûnunda kalemde mukayyed olmayarak hevâî kahveci gediğim vardır deyü müdâhaleden hâlî olmamağla suâl olunup dükkân-ı mezkûrdan kasr-ı yedine tenbîh olunmak matlûbumdur deyü bi’l-vekâle da‘vâ ettikde ol dahi cevâbında zikrolunan kahve gediği taraf-ı vakıfdan verilen işbu sened ile vakıf olmak üzre bana îcâr olunmuşdu dedikde mezbûr es-Seyyid Mehmed’e taraf-ı vakıfdan verilen sened mûcibince dükkân-ı mezkûr gediği olmak üzre memnû‘ olan kahve dükkânı olmayarak âhar dükkân yaptırıp derûnunda sâkin olması husûsuna mümâna‘at olunmamak bâbında şifâhen sâdır olan fermân-ı cihân-mutâ‘ları vekîl-i merkūm Hüseyin Efendi’ye tefhîm olunduğu İstanbul Mahkemesi’nden huzûr. Fî 19 Ca sene 1242