İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 246 Hüküm no: 185 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parseh ve Avadis zimmîlerin, yanan fincancı ve tuhafçı dükkânlarının gediğinin kayıt suretini istedikleri Tuhafçı gediği zâyi‘den sûret i‘tâsı istid‘âsı Ma‘rûz Sâdır olan fermân-ı âlîlerine imtisâlen tuhafçı ve fincâncı esnâfı kethudâ vekîli es-Seyyid Mustafa Ağa ile yiğitbaşısı Menteş Yahûdî ve ustalarından Sahak ve Nişan zimmîler meclis-i şer‘a celb ile sa‘âdetlü defterdâr efendi bendelerinin işbu takrîrinde zikrolunduğu üzre İstanbul’da Uzun Çarşı başında Kilid Hânı karşısında Fesçi Abdi Ağa ve Süleyman Ağa dükkânları beynlerinde kâin Başmuhâsebe’den verilen sûreti muhterikan zâyi‘ olan bir bâb tuhafçı ve fincâncı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme kaydı mûcibince zâyi‘den sûret istid‘â eden Parseh ve Avadis zimmîlerin el-yevm mülkleri midir suâl olundukda fi’l-vâki‘ gedik-i mezkûr el-yevm zimmiyân-ı mesfûrânın nısfiyet üzre mülk-i mahzları olduğunu her biri alâ-tarîkı’ş-şehâde ihbâr eyledikleri ma‘lûm-ı devletleri buyruldukda ber-vech-i istid‘â kaydı mûcibince zâyi‘den sûret i‘tâsı iktizâ eylediği İstanbul Mahkemesi’nden huzûr. Fî 25 min-Ca sene 1242