İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 246 Hüküm no: 186 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Arakil’in, Agik v. Arsen’den 291 guruş alacak davasının geçersiz olduğu Cihet-i havâleden 291 guruş 26 para men‘ Ma‘rûz İşbu târihden üç buçuk sene mukaddem hâlik olan Sarrâf Arakil v. Filibos zimmînin verâseti zevce-i metrûkesi Sima Nasrâniye ile sulbî kebîr oğulları Mıgırdıç ve Asvador zimmîler ve sulbiye kebîre kızları Margarit ve Takohi Nasrâniyelere ba‘de’l-inhisâr mersûm Asvador zimmî bi’t-terâzî dâ‘îhânelerinde ma‘kūd meclis-i şer‘-i münîrde habbâz esnâfından sahib-i arzuhâl Agik v. Arsen zimmî muvâcehesinde mersûm Agik zimmî otuz üç senesi hilâlinde babam mersûm Arakil zimmîye cihet-i karzdan zimmetinde deyni olan bin beş yüz kırk guruş ile babam mesfûru sağlığında esnâf-ı merkūmeden olup bundan akdem hâlik olan Markar zimmî üzerine sağlığında havâle eder oldukda babam mersûm muhayyer olup dilerse meblağ-ı merkūmu yine mersûm Agik zimmîden almak üzre havâle ve her biri bu vech üzre havâleyi kabûl ettiklerinden sonra babam mersûm meblağ-ı mezkûrun ancak beş yüz kırk guruşunu mersûm Markar zimmîden alıp mâ‘adâsını her birinden kable’l-ahz ve’l-istifâ hâlik ve bâkī kalan bin guruş benimle verese-i sâiresi mesfûrûna mevrûs olmağla meblağ-ı bâkī-i merkūmdan mes’ele-i mirasımız üzre benim hisse-i irsiyeme isâbet eden iki yüz doksan bir guruş yirmi altı para iki akçeyi mersûm Agik zimmîden bi’l-verâse taleb ederim deyü da‘vâ ol dahi külliyen inkâr etmekle müdde‘î-i mersûm Asvador zimmî da‘vâ-yı mezkûresini isbâta kādir olamayıp talebiyle mersûm Agik zimmîye bi’l-muvâcehe vech-i şer‘î üzre yemîn verilmeğin mûcibince müdde‘î-i mersûm Arakil zimmî da‘vâ-yı mezkûresiyle mersûm Agik zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 27 min-Ca sene 1242