İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 247 Hüküm no: 187 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşanan İsmail Ağa b. İsmail ile Şerife Hatice Hatun bt. Ali’nin mehr-i müeccel nizaları 1750 guruş mehir ve nafaka ile eşyâ teslîmine tenbîh Ma‘rûz Derûn-ı arzuhâlde ismi mezkûr el-Hâc İsmail Ağa b. el-Hâc İsmail nâm kimesne Çarşamba günü Arz Odası’nda huzûr-ı fâizü’n-nûr-ı âsafânelerinde ma‘kūd meclis-i şer‘-i münîrde zevce-i mutallakası sahibe-i arzuhâl mu‘arrefetü’z-zât Şerife Hadîce bt. es-Seyyid Ali nâm hatun muvâcehesinde mezbûre Şerife Hadîce Hatun mukaddemâ bin beş yüz guruş mehr-i müeccel tesmiyesiyle zevce-i menkûha-i metrûkem iken işbu bir kıt‘a i‘lâm mantûkunca otuz yedi senesinin Saferinin on dokuzuncu günü tatlîk edip zimmetimde mütekarrer ve ma‘kūdun-aleyh olan mehr-i müeccel-i mezkûr bin beş yüz guruş hâlâ ve nafaka-i iddet ve meûnet-i süknâsı mukābelelerinde bi’t-terâzî beynimizde ta‘yîn olunan iki yüz elli guruşu vakt-i istihkākda mezbûre Şerife Hadîce Hatun’a edâ ile ilzâm olunmuşidim lâkin mezbûre Şerife Hadîce Hatun eşyâ-i memlûkemden bir kaliçe seccâde ve bir kılıç ve bir simlice tüfenk ve bir sagīr çalar sâ‘at ve beş sîm zarf ve beş elmas-traş billûr bardak ma‘a-kapak ve bir cezve ve bir kahve tâbesi ve bir köhne parça kürk ve bir köhne kaput ve bir müsta‘mel şalvar ve bir mînâ toplu imâme ve bir göğer kadife cepkân antârî ve bir meşîn heğbe ve bir köhne boğça ve bir şem‘dân ile bin iki yüz elli guruş kıymetli yarım fermâyiş ta‘bîr olunur dört buçuk zirâ‘ bir şâl ve beş yüz guruş kıymetli Kara Mahmud-kârî altın işleme sîm takımlı bir tüfenk ve yirmi beş guruş kıymetli kehribâ ağızlıklı lâciverd takımlı bir kiraş [kiras] çubuğu bi-gayr-ı hakkın yedinde alıkoymağla eşyâ-i mezkûreyi bana verip mehr-i müeccel-i mezkûr ile vakt-i mürûr edip müstehık olduğu nafaka-i iddet-i mezkûresini yedimden ahza merkūme Şerife Hadîce Hatun’a tenbîh olunmak matlûbumdur deyü da‘vâ ettikde ol dahi cevâbında zikrolunan şâl ve tüfenk ve çubuğu külliyen inkâr ve mâ‘adâ eşyâ-i muharrere-i mezkûreyi vech-i meşrûh üzre alıkoyduğunu el-yevm yedinde mevcûd olduğunu ikrâr etmekle müdde‘î-i mezbûr zikrolunan şâl ve tüfenk ve çubuk müdde‘âlarını isbât etmeyip talebiyle mezbûre Şerife Hadîce Hatun’a bi’l-muvâcehe vech-i şer‘î üzre yemîn verilmeğin mûcibince mezbûr el-Hâc İsmail Ağa zikrolunan şâl ve tüfenk ve çubuk mutâlebesiyle merkūme Şerife Hadîce Hatun’a bilâ-beyyine mu‘ârazadan ba‘de’l-men‘ alâ-mûcib-i ikrârihimâ meblağ-ı mecmû‘-ı mezkûr bin yedi yüz elli guruşu merkūme Şerife Hadîce Hatun’a edâya merkūm el-Hâc İsmail Ağa’ya ve eşyâ-i muharrere-i mezkûreyi merkūm el-Hâc İsmail Ağa’ya teslîme mezbûre Şeri-fe Hadîce Hatun’a tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 9 min-şehri Rebî‘ülevvel sene 1242 [Beyaz Beyaz]