İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 248 Hüküm no: 188 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. İsmail’in, Ali Ağa b. Süleyman’a olan 325 guruş borcunu ödemesi gerektiği 325 guruş ilzâm Ma‘rûz Ali Ağa b. el-Hâc Süleyman nâm kimesne bâ-arzuhâl sâdır olan fermân-ı âlîlerine imtisâlen Çarşamba günü Arz Odası’nda huzûr-ı lâmi‘u’n-nûr-ı düstûrânelerinde ma‘kūd meclis-i şer‘-i münîrde mukaddemâ dâmadı el-Hâc İsmail Ağa b. el-Hâc İsmail muvâcehesinde mezbûr el-Hâc İsmail Ağa zimmetinde cihet-i karzdan bâ-temessük üç yüz yirmi beş guruş alacak hakkım olmağla hâlâ taleb ederim deyü da‘vâ ettikde ol dahi cevâbında ikrâr lâkin ben bundan akdemce dâyinim mezbûr Ali Ağa’yı gāib ani’l-meclis Bat Pazarı’nda Koltukçu Kara Mehmed nâm kimesne üzerine deyn-i mezkûruyla cümlemiz bir meclisde iken havâle-i mukayyede ile kabûlü hâvî havâle etmişdim deyü sûret-i def‘de eylediği havâle müdde‘âsını merkūm Ali Ağa inkâr etmekle mezbûr el-Hâc İsmail Ağa def‘-i mezkûrunu isbâta kādir olamayıp talebiyle mezbûr Ali Ağa’ya bi’l-muvâcehe vech-i şer‘î üzre yemîn verilmeğin mûcibince dâfi‘-i mezbûr def‘-i mezkûruyla bilâ-beyyine mu‘ârazadan ba‘de’l-men‘ ikrârıyla lâzım gelen meblağ-ı merkūm üç yüz yirmi beş guruşun müdde‘î-i mezbûr Ali Ağa’ya edâsıyla merkūm el-Hâc İsmail Ağa<<’ya>> ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 9 Ra sene 1242