İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 249 Hüküm no: 189 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mehmed’in, Yenikapı’daki kasab gediğini, Mustafa Efendi b. Mehmed Emin’e devrettiği Kasab ferâğı Ma‘rûz Hudâvendigâr-ı esbak cennet-mekân adn-âşiyân merhûm ve mağfiret-nişân Sultân Abdülhamid Han -tâbe serâhu- hazretlerinin evkāf-ı celîleleri müstagallâtından İstanbul’da Yedikule kapısı hâricinde vâki‘ gayrı-ez selhhâne-i mîrî on aded ganem selhhânelerinden beşinci selhhâneye merbût kasab dükkânlarından İstanbul’da Langa Yenikapısı hâricinde aşçı dükkânı ittisâlinde kâin bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hisse-i şâyi‘asına bâ-re’y-i mütevellî mutasarrıf olan kasab Hasan b. Mehmed nâm kimesne meclis-i şer‘-i enverde bâ‘isü’l-i‘lâm kābız-ı mâl el-Hâc Mustafa Efendi b. el-Hâc Mehmed Emin tarafından husûs-ı âtîde tasdîka vekîl-i şer‘îsi es-Seyyid Hâfız Ali Efendi b. es-Seyyid Mustafa mahzarında Yedikule kassâbânı kethudâsı el-Hâc Hasan Ağa hazır olduğu hâlde zikrolunan kasab dükkânı gedik âlâtında ber-vech-i muharrer mutasarrıf olduğum nısf hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûza bâ-re’y-i mütevellî müvekkil-i merkūm el-Hâc Mustafa Efendi’ye ferâğ ve tefvîz ve teslîm eylediğimde ol dahi tefevvüz ve tesellüm ve kabz ve kabûl edip ba‘de’l-yevm sâlifü’z-zikr nısf hisse-i şâyi‘a müvekkil-i mezbûr el-Hâc Mustafa Efendi’nin dâhil-i havza-i tasarrufu ve hakk-ı müfevvazı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i ma‘lûmenin nısf hisse-i şâyi‘ası merkūm Hasan’ın ferâğından müvekkil-i mezbûr el-Hâc Mustafa Efendi’nin üzerine defter-i vakf-ı şerîfe kayd ve yedinde olan temessük hâmişine tahrîr ve zabt ve tasarrufu’çün taraf-ı vakıfdan müvekkil-i merkūm el-Hâc Mustafa Efendi yedine i‘tâ buyurulmak iktizâ eylediği İstanbul Mahkemesi’nden huzûr. Fî 19 min-Ca sene 1242