İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 249 Hüküm no: 190 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Mehmed’in, Aksaray’daki kasap gediğini Mustafa Efendi b. Mehmed Emin’e devrettiği Kasab ferâğı Hudâvendigâr-ı esbak cennet-mekân firdevs-âşiyân merhûm ve mağfiret-nişân Sultân Abdülhamid Han -tâbe serâhu- hazretlerinin evkāf-ı celîleleri müstagallâtından İstanbul’da Yedikule kapısı hâricinde vâki‘ gayrı-ez selhhâne-i mîrî on aded ganem selhhânelerinden altıncı selhhâneye merbût kasab dükkânlarından İstanbul’da Aksaray sebîli hizâsında bakkāl dükkânı karşısında kâin bir bâb kasab dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin iki kıt‘a temessük ile birer rubu‘dan nısf hisse-i şâyi‘asına mutasarrıf olan Kasab Abdullah b. Mehmed nâm kimesne meclis-i şer‘-i münîrde bâ‘isü’l-i‘lâm kābız-ı mâl el-Hâc Mustafa Efendi b. el-Hâc Mehmed Emin nâm kimesne tarafından husûs-ı âtîde tasdîka vekîl-i şer‘îsi es-Seyyid Hâfız Ali Efendi b. es-Seyyid Mustafa nâm kimesne mahzarında Yedikule kassâbânı kethudâsı el-Hâc Hasan Ağa b. el-Hâc Osman hazır olduğu hâlde zikrolunan kasab dükkânı gedik âlâtında bâ-ma‘rifet-i mütevellî ber-vech-i muharrer mutasarrıf olduğum nısf hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûza bâ-re’y-i mütevellî müvekkil-i merkūm el-Hâc Mustafa Efendi’ye ferâğ ve tefvîz ve teslîm eylediğimde ol dahi tefevvüz ve tesellüm ve kabz ve kabûl edip ba‘de’l-yevm sâlifü’z-zikr nısf hisse-i şâyi‘a müvekkil-i mezbûr el-Hâc Mustafa Efendi’nin dâhil-i havza-i tasarrufu ve hakk-ı müfevvazı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i ma‘lûmenin nısf hisse-i şâyi‘ası merkūm Abdullah’ın ferâğ ve kasr-ı yedinden müvekkil-i mezbûr el-Hâc Mustafa Efendi’nin üzerine tahrîr ve yedinde olan atîk temessükleri battalda hıfz olunarak zabt ve tasarrufu’çün taraf-ı vakıfdan yedine müceddeden temessük i‘tâ buyurulmak iktizâ eylediği İstanbul Mahkemesi’nden huzûr. Fî 19 min-Ca sene 1242