İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 250 Hüküm no: 191 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Kerope ile zevcesinin dükkân kiracısı Agop v. Ohannes’in, kahve gediğini başka bir gediğe tahvil etmesi gerektiği Kahve dükkânı nizâ‘ı Ma‘rûz Âsitâne-i aliyyede vâki‘ nargileci tâifesinden olup kendi nefsinden asîl ve zevcesi Varvara bt. Agop Nasrâniye tarafından husûs-ı âtîde vekîl-i sâbitü’l-vekâlesi sahib-i arzuhâl Agop v. Kerope zimmî Çarşamba günü Arz Odası’nda huzûr-ı ma‘delet-nüşûr-ı âsafânelerinde ma‘kūd meclis-i şer‘-i münîrde derûn-ı arzuhâlde mersûmu’l-ism Kuyumcu Agop v. Ohannes zimmî muvâcehesinde mersûm Agop zimmî İstanbul’da Samatya kurbünde Abdi Çelebi mahallesinde Yuvan Şerbethânesi ittisâlinde kâin mersûm Agop <> müvekkilem mesfûre ile bi’l-iştirâk ve bi’l-icâreteyn mustasarrıf olduğumuz menzil tahtında kâin bir bâb kahvehânede beher şehr beşer buçuk guruş kirâ tesmiyesiyle müşâhereten müste’cirimiz iken kahvehâne-i mezkûre bu def‘a sâir kahvehâneler ile ma‘an bâ-fermân-ı âlî sedd ü bend ve ocağı hedm olunup biz dahi târih-i i‘lâm şehri gāyetine izâfetle fesh-i akd-i icâre edip ol vechile zimmî-i mersûmun kahve-i hâne-i [kahvehâne-i] mezkûrede bir gûne alâkası kalmamağla ihrâc murâd eylediğimizde Başmuhâsebe’de mukayyed olmayarak derûnunda hevâî kahveci gediğim vardır deyü hurûcdan imtinâ‘ etmekle suâl olunup zimmî-i mersûm kahvehâne-i mezkûreden ihrâc olunmak bi’l-asâle ve bi’l-vekâle matlûbumdur deyü da‘vâ ettikde ol dahi cevâbında kahvehâne-i mezkûre gediği mukaddemâ gāib ani’l-meclis Mehmed Ağa nâm kimesnenin mâlı iken mersûm Agop zimmî menziline katmak için gāib-i mezbûrdan şirâya tâlib oldukda ziyâde bahâsına yeniden alamayıp ba‘dehû benim gāib-i merkūm ile ülfetim olduğundan bana gelip gedik-i mezkûru her kaç guruşa alabilir isen sen kendin iştirâ eyle sonra ben senden satın alırım deyip ben dahi gedik-i merkūmu gāib-i mezbûrdan üç bin elli guruş semen-i medfû‘a [39b] iştirâ ve dükkân-ı mezkûru dahi mesfûrândan kirâ-yı kadîmi olan şehriye beşer buçuk guruşa istîcâr ve bir müddet derûnunda temekkün ve ba‘dehû mukaddem ifâdesi vechile gedik-i mezkûru vermek murâd eylediğimde bu kazıyyeyi külliyen inkâr ve almakdan imtinâ‘ etmekle ben dahi merbût olan i‘lâm-ı şer‘îde tafsîl olunduğu vechile meblağ-ı mezkûru mersûm Agop zimmîden lede’d-da‘vâ fetvâ-yı şerîfeye mürâca‘at olundukda meblağ-ı mezkûru şer‘an mersûmdan da‘vâya kādir olamayıp bî-vech-i şer‘î mu‘ârazadan men‘ olunmamla ben dahi dükkân-ı mezkûru kahvehâne olmayarak âhar memnû‘ olmayan dükkân olmak üzre isti‘mâl murâd etmiş iken müdde‘î-i mersûm Agop zimmî bir akçe vermeyerek dükkân-ı mezkûru menziline ilâve murâdına bu gûne hîle ve tasannu‘ ile sûret buldurup bana gadr irâdesindedir dedikde hıfzan li’n-nizâmi’l-müte‘âref mersûm Kuyumcu Agop zimmî gediğine mâlik olduğu dükkân-ı mezkûru kahvehâne olmayarak âhar memnû‘ olmayan dükkân olmak üzre temekkün ve isti‘mâl edip kat‘a mümâna‘at olunmamak bâbında lisânen şeref-bahş-ı sahîfe-i sudûr olan fermân-ı cihân-mutâ‘ları mersûm Agop zimmîye tefhîm olundukda ol dahi sem‘an ve tâ‘a[ten] merâsimini edâ ve dükkân-ı mezkûru şehr-i âtî Cumâdelâhire gurresinden i‘tibâr ile kirâ-yı kadîmi olan beher şehr beşer buçuk guruşa mersûm Kuyumcu Agop zimmîye dâ‘îhânelerinde kabûlü hâvî îcâr ve teslîm eylediği İstanbul Mahkemesi’nden huzûr. Fî 27 min-Ca sene 1242