İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 251 Hüküm no: 192 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavuk Pazarı’nda yanan bakkal dükkânlarının tütüncü dükkânına ilave edilmeksizin eski halinde inşa edilmesi gerektiği Tavuk Pazarı’nda bakkāl ve tütüncü dükkânı arsası nizâ‘ı Ma‘rûz Sahib-i arzuhâl Rapayil v. Karabet zimmî evvelen taraf-ı şer‘-i enverden me’zûnen mürsel Mevlânâ es-Seyyid Salih Afîf Efendi dâ‘îlerinin bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi ile Pazar günü dîvân odasında huzûr-ı hazret-i ağa-yı Dârü’s-sa‘âdeti’ş-şerîfede ve ba‘dehû bi’l-iktizâ mahâllinde keşf ve mu‘âyene için mevlânâ-yı mûmâ-ileyhin İstanbul’da Tavuk Pazarı kurbünde Baklalı Han ittisâlinde kâin zikri câ’î münâza‘un-fîh olan arsada müfettiş-i mûmâ-ileyh tarafından meb‘ûs Kâtib es-Seyyid Mustafa Racih Efendi ve hâssa mi‘mârı ağa hulefâsından Ahmed Mümtaz ve İsmail Kemâlî Halîfeler ve sâir Müslimîn huzûrlarında akd eylediği meclis-i şer‘-i münîrde derûn-ı arzuhâlde mezkûru’l-ism Mustafa Ağa b. Ahmed muvâcehesinde nezâret-i hazret-i müşârün-ileyhde âsûde evkāfdan Ayasofya-i Kebîr Vakfı mütevellîsi kâtib-i hazret-i ağa-yı müşârün-ileyh izzetlü Mehmed Reşid Efendi tarafından mürsel câbî-i vakf İbrahim Efendi ile Kigork v. Agop ve Dimo v. Yorgi ve Yani v. Yorgi ve Yorgi v. Yani ve Nikola v. Yani zimmîler hazır oldukları hâlde işbu arzuhâle merbût diğer arzuhâl hâmişine mastûr defter-i vakfdan muhrec derkenâr nâtık olduğu üzre işbu derûnunda akd-i meclis-i şer‘-i âlî olunan biri Hacı Ali dükkânı demekle meşhûr dört kepenkli bakkāl ve biri iki kepenkli tütüncü iki bâb dükkân arsalarının yüz yirmi beş sehm i‘tibârıyla elli altı sehm beş pul hisse-i şâyi‘ası merkūm Mustafa Ağa’nın ve elli bir sehm bir pul hisse-i şâyi‘ası benim bâ-temessük-i mütevellî bi’l-icâreteyn tasarrufumuzda ve mâ‘adâ on yedi sehm iki pul hisse-i şâyi‘ası dahi mutasarrıfının bilâ-veled fevtinden mahlûl ve taraf-ı vakfa âid ve zikrolunan bakkāl dükkânının Başmuhâsebe’de mukayyed ve mu‘teber gedik ta‘bîr olunan âlât-ı lâzıme-i ma‘lûmesi yüz yirmi sehm i‘tibârıyla mersûmûn Dimo ve Yani ve Yorgi ve Nikola zimmîlerin ve zikrolunan tütüncü dükkânının dahi ma‘den kaleminde mukayyed ve mu‘teber gedik ta‘bîr olunur âlât-ı lâzıme-i ma‘lûmesi müstakillen mersûm Kigork zimmînin mülkleri iken ve dekâkîn-i mezkûrîn bundan akdem bi-kazâillâhi te‘âlâ vukū‘ bulan harîkde muhterik oldukda merkūm Mustafa Ağa bakkāl tâifesi mesfûrûn ile sâlifü’z-zikr bakkāl dükkânını heyet-i asliyesi üzre inşâ etmek dâ‘iyesiyle temel direklerini nasb ve tabanlarını itâle edip lâkin ben hisse-i şâyi‘amın cümlesini tütüncü dükkânına ilâve ile tevsî‘ murâd eylediğimde merkūm Mustafa Ağa ile bakkāl tâifesi mersûmûn mümâna‘at etmeleriyle mümâna‘atları men‘ olunmak matlûbumdur dedikde işbu hazır bi’l-meclis bakkāl pazarbaşısı Süleyman Ağa’nın yedinde olup meclis-i şer‘-i şerîfde bi’l-muvâcehe kırâet olunan bâlâsı tuğrâ-yı garrâ-yı hazret-i hilâfet-penâhî ile müzeyyen bir kıt‘a fermân-ı celîlü’ş-şânda bu makūle muhterik yahud sûret-i âhar ile ta‘mîr ve tecdîde muhtâc olan bakkāl dükkânları fukarânın kilârı mesâbesinde olduğundan kat‘a tağyîr ve tebdîl ve âhar akāra tahvîl olunmayıp heyet-i asliyesi üzre bakkāl dükkânı binâ ve inşâ ettirilmek sarâhaten mastûr olmağın bu sûretde ber-mûcib-i emr-i celîlü’ş-şân bakkāl dükkânı arsası kat‘a tağyîr olunmayarak heyet-i asliyesi üzre bakkāl dükkânı binâ olunması iktizâ edip mersûmun bakkāl dükkânı arsasından tütüncü dükkânına ilâve iddi‘âsı hilâf-ı emr-i âlî idüğü kendüye tefhîm olunup ancak merkūm Mustafa Ağa ile gedik sahibleri mesfûrûn Dimo ve Yani ve Yorgi ve Nikola zimmîler komşuluğa ri‘âyeten köprü başında mağaza kapısı ağzına nasb olunan temel direği mikdâr-ı zerre ref‘ ve tahrîf olunmayarak yalnız zukāk cânibinde olan temel direğini rızâlarıyla on dört parmak beri alıp tütüncü dükkânının yüzü vüs‘atlice olarak iki dükkân arasında olan dîvârı şedd ü münharif binâya cümlesi râzılar olup beynleri te’lîf olunduğu ba‘de’l-inhâ İstanbul Mahkemesi’nden huzûr. Fî 26 Ca sene 1242