İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 253 Hüküm no: 193 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstinye’de palamar yerinde Şeyh Mehmed Geylanî Vakfı’na ait eve, Marangoz İbrahim b. Abdullah’ın tasarruf edeceği İstinye karyesinde palamar yeri nizâ‘ı Ma‘rûz Nezâret-i hazret-i şeyhülislâm-ı sellemehü’s-selâmîde âsûde hudâvendigâr-ı esbak cennet-mekân Sultân Bâyezid Hân-ı Velî -tâbe serâhu- hazretleri vakf-ı şerîfinin bi’l-fi‘il mütevellîsi Kādızâde fazîletlü Mehmed Ârif Efendi tarafından vekîl-i müsbet-i şer‘îsi câbî-i vakf Mehmed Emin Efendi b. Abdullah zikri câ’î münâza‘un-fîh olan arsanın şehriye on iki akçe bedel-i öşr-i maktû‘ ile müste’ciri sahibe-i arzuhâl Âişe bt. Ahmed nâm hatunun kızı ve tarafından vekîl-i müseccel-i şer‘îsi mu‘arrefetü’z-zât Ni‘metî Hatun bt. Hasan hazır olduğu hâlde Çarşamba günü Arz Odası’nda huzûr-ı fâizü’n-nûr-ı âsafânelerinde ma‘kūd meclis-i şer‘-i münîrde nezâret-i dâ‘îlerinde olan evkāfdan merhûm ve mağfûrun-leh Şeyh Mehmed Geylânî Vakfı’nın kāimmakām-ı mütevellîsi el-Hâc Hâfız Mehmed Efendi b. Hüseyin muvâcehesinde mahrûse-i Galata’ya muzâfe İstinye karyesinde kâin ma‘lûmü’l-hudûd palamar yeri ta‘bîr olunur arsa-i hâliye ile ittisâlinde kâin menziline şeyh-i mûmâ-ileyh vakfından olmak üzre vaz‘-ı yedi ahâlî-i karye-i merkūmeden Arabacı Mehmed Said b. Ahmed ve Mehmed Ârif Reis b. Ömer haberleriyle mütehakkık olan Marangoz İbrahim b. Abdullah kezâlik hazır olduğu hâlde arsa-i merkūme mütevellîsi vekîli olduğum vakf-ı müşârün-ileyhden olmak üzre mutasarrıf olan es-Seyyid İsmail nâm kimesne bilâ-veled fevt olmağla mahlûlünden kırk bir senesi beş yüz guruş mu‘accele-i makbûza ve mukāta‘a-i kadîmesiyle müvekkile-i mezbûreye îcâr olunmuşdu el-hâletü hâzihî kāimmakām-ı mezbûr bi-gayr-ı hakkın zabt ve tasarruf etmekle suâl olunup [40a] keff-i yedine tenbîh olunmak bi’l-vekâle matlûbumdur dedikde kāimmakām-ı mezbûr dahi cevâbında arsa-i merkūme ile menzil-i mezkûr yedimde mevcûd mübâya‘a hücceti târihinden bu âna gelince yüz seneden mütecâviz müddetde şeyh-i mûmâ-ileyh vakfından vakf-ı müşârün-ileyh mütevellîleri ve mürtezikaları taraflarından da‘vâ sudûr etmeyip bilâ-özr sükût dahi etmeleriyle bi-hakkın tasarruf ederim deyü eylediği def‘ini li-ecli’l-isbât taraf-ı dâ‘iyânemden ve müfettiş-i mûmâ-ileyh tarafından me’zûnen irsâl olunan kâtib Mevlânâ es-Seyyid Salih Afîf Efendi dâ‘îleri ümenâ-i şer‘ ve tarafeyn ile mahâll-i nizâ‘a varıp akd eylediği meclis-i şer‘de lede’t-tezkiye adl ve makbûlü’ş-şehâde idükleri ihbâr olunan ahâlî-i karye-i merkūmeden muhbirân-ı mezbûran ve es-Seyyid İbrahim b. el-Hâc Ahmed nâm kimesneler ta‘yîn-i hudûd ederek arsa-i merkūme menzil-i mezbûr ile ma‘an şeyh-i mûmâ-ileyh vakfından ez-kadîm bi’l-muvâcehe bilâ-nizâ‘ zabt ve tasarruf olunup da‘vâ mümkün iken bilâ-özr sükût eylediklerini haber vermeleriyle mevlânâ-yı mûmâ-ileyh huzûr-ı âsafânelerine gelip tarafeyn hazır oldukları hâlde tasdîklerine mukārin inhâ etmeğin mûcibince ba‘de’l-hükm vekîl-i mezbûrun da‘vâsı mesmû‘a olmayıp arsa-i merkūme kemâ-kân şeyh-i mûmâ-ileyh vakfından olarak mezbûr İbrahim’in tasarrufu iktizâ eylediği İstanbul ve Teftîş-i Evkāf Mahkemelerinden bi’l-ma‘iyye huzûr. Fî 11 Ca sene 1242