İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 254 Hüküm no: 194 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said’in Kadırga’daki berber dükkânı gediğini başka bir yere nakletmesinde mahzur görülmediği Berber gediği nakli Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul’da Kadırga limanında bakkāl kurbünde vâki‘ Başmuhâsebe’de Mustafa ismine mukayyed ve taht-ı nizâma dâhil ve mu‘teber bir bâb berber dükkânının mutasarrıfı eşedd-i lüzûmuna binâen menziline idhâl edip ol vechile derûnunda olan gediğinin ber-mûcib-i şurût-ı nizâm kurb ve civârında kâin âhar gedikden hâlî dükkâna nakli lâzım geldiğine binâen kurb ve civârında kendi dükkânı ittisâlinde vâki‘ âhar gedikden ârî bir bâb dükkâna nakl ile ism ve mahâll-i evvelin kaydları ref‘ ve terkīn ve kendi ismine tashîhan kayd ile yedine sûret i‘tâsını gedik-i mezkûra tedâvül-i eydî ile el-yevm şirâen mâlik olan berber esnâfından sahib-i arzuhâl es-Seyyid Mehmed Said kulları istid‘â eylediği mefhûm-ı arzuhâlden müstebân ve gedik-i mezkûr mukayyed ve mu‘teber kadîm berber gediklerinden olduğu hâmiş-i arzuhâlde mastûr Başmuhâsebe derkenârından müstefâd ve nümâyân oldukdan sonra esnâf-ı merkūme kethudâsı İbrahim Ağa ve şeyhi Abdi Efendi ve du‘âcısı İsmail Efendi ve yiğitbaşısı es-Seyyid Mehmed Nuri Ağa ve çavuşu Mustafa Usta ve köşe ustası Abdi Ağa ve sâirleri nezd-i dâ‘iyâneme celb ile keyfiyeti suâl olundukda fi’l-vâki‘ gedik-i mezkûr el-yevm sahib-i arzuhâl-i mezbûrun mülkü olup ber-vech-i istid‘â nakl dahi şurût-ı nizâmlarına muvâfık olduğunu ihbâr etmeleriyle bu sûretde naklolunacak dükkân ne makūle dükkândır ve bir gûne mahzûru var mıdır mahâllinde ahâlîden tahkīk için Kâtib es-Seyyid Salih Afîf Efendi ve kethudâ ve ustalar irsâl olundukda onlar dahi varıp kurb ve civârında bulunan bî-garaz Müslimînden Ahmed Efendi b. Süleyman ve Ali Efendi b. Mehmed ve İbrahim Efendi b. Ahmed ve Ali Ağa b. Ahmed ve Kadri Ağa b. Hasan nâm kimesnelerden suâl eylediklerinde dükkân-ı mezkûr mukaddemâ attar ve ba‘dehû tütüncü ve ba‘dehû kahve olarak bir müddet açık durmuş ve ba‘dehû bir buçuk sene mukaddem işlemediğinden kendi tabî‘atıyla kapanıp hayli zaman mu‘attal kalmış olduğundan kahvehânelerin seddü bendi husûsuna irâde-i seniyye ta‘alluk eylediği hînde dükkân-ı mezkûr kapalı bulunup bâ-fermân-ı âlî sedd ü bend olunan kahvelerden olmayıp âhar gûne dahi bir hüccet ve mahzûru olmadığını haber verdiklerini mevlânâ-yı mûmâ-ileyh dahi gelip inhâ eylediği ma‘lûm-ı ilm-i âlem-ârâları buyruldukda ber-vech-i istid‘â müsâ‘ade-i seniyyeleri erzânî buyurulur ise ber-vech-i muharrer nakl ve ismine tashîh ile yedine sûret i‘tâsı re’y-i âlîlerine menût idüğü İstanbul Mahkemesi’nden huzûr. Fî 6 C sene 1242