İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 256 Hüküm no: 196 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Plevneli Memiş b. Mehmed’in, Mehmed Arif b. Hüseyin’e sığır zararı davasından men edildiği Sürek ta‘bîr olunur sığır zararı da‘vâsı men‘i Ma‘rûz Sığır celebânından sahib-i arzuhâl Plevneli Memiş b. Mehmed nâm kimesne meclis-i şer‘-i münîrde Âsitâne-i aliyyede vâki‘ sığır kassâbânı tâifesinden derûn-ı arzuhâlde mezkûru’l-ism es-Seyyid Mehmed Ârif b. es-Seyyid Hüseyin muvâcehesinde kethudâları Osman Ağa ve sâir mazbûtü’l-esâmî kassâbân tâifesi hazır oldukları hâlde ben işbu sene-i mübârekede Âsitâne-i aliyyeye sevk ve tesyîr için Tuna sevâhilinden cem‘ eylediğim sığır süreklerini esnâ-yı râhda mahrûse-i Edirne’ye getirdiğimde mezbûr es-Seyyid Mehmed Ârif dahi İstanbul’dan mahrûse-i mezbûreye gelip zikrolunan sığırların seksen beş çiftini beğenip beher çiftini yüz yirmi ikişer guruşa benimle bi’t-terâzî kat‘-ı pazar ile iştirâ ve tesellüm ve bir re’s al bargirimi dahi üzerinde olan takımıyla ma‘an yüz otuz guruşa benden kezâlik iştirâ ve tesellüm ettikden sonra mezbûr es-Seyyid Mehmed Ârif semen-i mezkûrdan bir akçe <> vermeden zikrolunan bargir ve sığırları bırakıp mahrûse-i mezbûreden ber-takrîb firâr etmekle ben dahi zikrolunan bargir ve sığırları alıp İstanbul’a nakl ile sâlifü’z-zikr bargir takımıyla yedimde telef ve mârrü’z-zikr sığırların dahi beher çiftini yüz on beşer guruşa âhara bey‘le istihlâk edip ol vechile beher çiftinde yedişer guruş noksan gelmekle bu takdîrce noksanı olan beş yüz yetmiş beş guruş ile zikrolunan bargir ma‘a-takımın mukaddem tesmiye olunan yüz otuz guruş semenini mezbûr es-Seyyid Mehmed Ârif’den taleb ederim deyü da‘vâ ettikde ilzâm için tarafeyn fetvâ-yı şerîfe havâle olundukda onlar dahi mübâşiri ma‘rifetiyle varıp bi’l-muvâcehe istiftâ eylediklerinde müdde‘î-i mezbûr Memiş’in takrîr-i meşrûhu üzre zikrolunan bargir ve sığırları alıp telef ve istihlâk eylediğine binâen bey‘-ı mezkûr bâtıl olmağla şer‘an semeni lâzım gelmediği şer‘-i şerîfden iftâ buyrulduğunu tarafeyn yine huzûr-ı şer‘a gelip takrîr etmeleriyle bu sûretde ber-muktezâ-yı şerî‘at-i garrâ meblağ-ı mezkûru mezbûr es-Seyyid Mehmed Ârif’den taleb ve da‘vâya kādir olamadığı müdde‘î-i mezbûr Memiş’e tefhîm ve da‘vâ-yı mezkûresiyle merkūm es-Seyyid Mehmed Ârif’e bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 3 C sene 1242