İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 257 Hüküm no: 197 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mustafa’nın, Karalim v. Apostol’den 996 guruş alacağı olduğunu ispat edemediği 996 guruş men‘ Ma‘rûz Derûn-ı arzuhâlde mezkûru’l-ism Halil b. Mustafa nâm kimesne meclis-i şer‘-i münîrde bakkāl tâifesinden arzuhâl eden Karalim v. Apostol zimmî muvâcehesinde mukaddemâ Bandırma’dan kendi kayığım ile Kapan-ı dakīke nakleylediğim şa‘îrden bin iki yüz otuz sekiz senesi hilâlinde mersûm Karalim zimmînin beher keyli yüz yirmi dörder paraya olarak yedimden ve mâlımdan iştirâ ve kabz eylediği üç yüz keyl arpa semeninden dokuz yüz otuz guruş ve şa‘îr-i mezkûru dükkânına nakl için mersûmun bi-şartı’r-rücû‘ emriyle mâlımdan bargir kirâsına verdiğim elli bir guruş ve kezâlik mesfûrun emriyle şa‘îr-i mezkûru vezn eden kîleciye mâlımdan verdiğim on beş guruş ki min-haysü’l-mecmû‘ mersûm Karalim zimmî zimmetinde dokuz yüz doksan altı guruş alacak hakkım olmağla meblağ-ı mecmû‘-ı mezkûr dokuz yüz doksan altı guruşu mesfûr Karalim zimmîden hâlâ taleb ederim deyü da‘vâ ettikde mersûm Karalim zimmî dahi cevâbında gerek emrini ve gerek iştirâsını külliyen inkâr etmekle müdde‘î-i mezbûr Halil hâmiş-i arzuhâle bâ-fermân-ı âlî Ahî Çelebi Mahkemesi’nden derkenâr olunan mazbata kaydı mantûkunca tekrar beyâna havâle olundukda lede’l-istimhâl ve’l-imhâl müddet-i mehil-i şer‘î kirâren ve mirâren mürûr edip bir vechile isbâta kādir olamamağla talebiyle mersûm Karalim zimmîye muvâcehesinde vech-i şer‘î üzre yemîn verilmeğin mûcibince müdde‘î-i mezbûr Halil da‘vâ-yı mezkûresiyle mersûm Karalim zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 29 Ca sene 1242