İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 258 Hüküm no: 198 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahî Sadeddin ve Ahî Fahreddin Malikanesi Vakfı tevliyetinin, babasının ölümü ile Şâkire Hatun’a tevcih edilmek istendiği Tevliyet tevcîhi istid‘âsı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda Amasya’ya tâbi‘ Yağmur karyesinde vâki‘ Ahî Sadeddin ve Ahî Fahreddin Mâlikânesi Vakfı’nın vazîfe-i mu‘ayyene ile bâ-berât-ı âlî mütevellîsi olan eslah ve erşed evlâd-ı vâkıfdan pederi Hâfız Mehmed Halîfe fevt olup tevliyet-i mezbûre mahlûl olduğu beyânıyla tevliyet-i mezbûre pederi mahlûlünden kendüye tevcîh ve yedine berat-ı şerîf-i âlî-şân sadaka ve ihsân buyurulmasını sahibe-i arzuhâl Şâkire Hatun istid‘â eylediği mefhûm-ı arzuhâlden müstebân ve tevliyet-i mezbûre mutasarrıfı müteveffâ Hâfız Abdullah’ın mahlûlünden oğlu mezbûr Hâfız Mehmed Halîfe üzerinde olduğu Anadolu Muhâsebesi derkenârından müstefâd ve nümâyân oldukdan sonra ruûs-ı hümâyûn derkenârında bast olunduğu üzre tevliyet-i mezkûre mutasarrıfı mezbûr Hâfız Mehmed Halîfe’nin fevti vâki‘ ve sahibe-i arzuhâl mezbûre Şâkire Hatun müteveffâ-yı mezbûrun sulbiye-i sahîha kerîmesi olup mezbûreden gayrı müstehıkkı olmadığını bî-garaz Müslimînden Çoban Çavuş Mescidi İmâmı es-Seyyid Mehmed Ârif b. es-Seyyid Mustafa ve Kâtib Sinan mahallesi imâmı Hâfız Mehmed Efendi b. el-Hâc Salih ve Göncü Hâfız İbrahim Efendi b. Mustafa nâm kimesneler meclis-i şer‘-i şerîfde alâ-tarîkı’ş-şehâde ihbâr eyledikleri ma‘lûm-ı âlem-i [ilm-i] âlem-ârâları buyruldukda tevliyet-i mezkûre müteveffâ-yı mezbûr Hâfız Mehmed Halîfe’nin mahlûlünden sulbiye sahîha kızı olduğu ihbâr olunan mezbûre Şâkire Hatun’a tevcîh ve kaleminden yedine berat-ı şerîf-i âlî-şân inâyet ve ihsân buyurulmak bâbında emr u fermân hazret-i veliyyü’l-emrindir. Fî 29 min-Ca sene 1242