İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 259 Hüküm no: 199 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’daki Pir Ak Bey ve Şadi Bey Vakfı’nın tevliyetinin, babasının ölümü ile Şâkire Hatun’a tevcih edilmek istendiği Tevliyet tevcîhi istid‘âsı Ma‘rûz Sâdır olan fermân-ı âlîlerine imtisâlen işbu arzuhâl ve derkenârlara nazar olundukda Amasya’da vâki‘ müteveffâ Pir Ak Bey ve Şâdî Bey evlâdlarından Mahmud Çelebi ve Yakub Şah Vakfı’nın vazîfe-i mu‘ayyene ile sülüsân-ı tevliyetine bi’l-meşrûta mutasarrıf olan pederi Hâfız Mehmed Halîfe fevt olup tevliyet-i mezbûre mahlûl olduğu beyânıyla tevliyet-i mezbûre ber-vech-i meşrûtiyyet pederi mahlûlünden kendüye tevcîh ve yedine berat-ı şerîf-i âlî-şân sadaka ve ihsân buyurulmasını sahibe-i arzuhâl Şâkire Hatun istid‘â eylediği mefhûm-ı arzuhâlden müstebân ve Amasya sancağında Gelgedan [Geldiklan] nâhiyesinde vâki‘ Gelgedan [Geldiklan] ve Musa ve Kârbânsaray ve Korıobası [Kutluobası]? karyeleri vakfiye-i ma‘mûlün-bihâ ve Defterhâne-i âmirede Mahmud Çelebi ve Yakub Şah Çelebi Vakfı deyü mukayyed ve berat kaydında Pir Ak Bey ve Şâdî Bey Vakfı deyü muharrer iken mezbûrân Pir Ak Bey ve Şâdî Bey’in Amasya’da âhar vakfı olmayıp ancak oğulları mezbûrân Mahmud Çelebi ve Yakub Şah Çelebi Vakfı olarak ikisi bir tevliyet olmağla ol vechile karye-i mezkûreler evlâd-ı vâkıfdan Hâfız Mehmed Halîfe ibnü’l-müteveffâ Amasyevî Hâfız Abdullah’ın üç yüz seneden mütecâviz eben-an-ced evlâdiyet ve meşrûtiyyet üzre vazîfe-i mu‘ayyene ile tevliyeti tasarrufunda olan vakfı kurâları olduğu tahkīk ve bâ-hatt-ı hümâyûn-ı şevket-makrûn Mahmud Çelebi ve Yakub Şah Çelebi Vakfı tevliyeti kaydı terkīn olunup Pir Ak Bey ve Şâdî Bey Vakfı olarak sülüsân hisse-i tevliyet bin iki yüz on beş senesi Cemâziyelevvel’in yirmi üçüncü günü müceddeden mezbûr Hâfız Mehmed Halîfe’ye tevcîh ve ibkā beratı verildiği Anadolu Muhâsebesi derkenârından müstefâd ve nümâyân oldukdan sonra ruûs-ı hümâyûn derkenârında bast olunduğu üzre sülüsân hisse-i tevliyet-i mezkûre mutasarrıfı mezbûr Hâfız Mehmed Halîfe’nin fevti vâki‘ ve sahibe-i arzuhâl mezbûre Şâkire Hatun müteveffâ-yı mezbûrun sulbiye-i sahîha kerîmesi olup mezbûreden gayrı müstehıkkı olmadığını bî-garaz Müslimînden Çoban Çavuş Mescidi İmâmı es-Seyyid Mehmed Ârif Efendi b. es-Seyyid Mustafa [41a] ve Kâtib Sinan mahallesi imâmı Hâfız Mehmed Efendi b. el-Hâc Salih ve Göncü Hâfız İbrahim Efendi b. Mustafa nâm kimesneler ihbâr etmeleriyle bu sûretde ber-mantûk-ı kayd sülüsân hisse-i tevliyet-i mezbûre Şâkire Hatun’a tevcîh buyurulmak re’y-i âlîye menût idüğü İstanbul Mahkemesi’nden huzûr-ı âlîlerine i‘lâm olundu bâkī emr u fermân hazret-i veliyyü’l-emrindir. Fî 29 Ca sene 1242