İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 260 Hüküm no: 200 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakızzâde Ali Çelebi Evkafı’ndan kullanılmayan Malta Fırını’nın eve tahvil edilmesi için emr-i âlî talebi Malta Fırını taraf-ı vakıfdan âhara îcârı ve menzil binâsına emr istid‘âsı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda nezâret-i dâ‘îlerinde olan evkāfdan merhûm Karakızzâde Ali Çelebi Evkāfı müsakkafâtından Ebulfeth Sultân Mehmed Han -aleyhi’r-rahmetü ve’l-gufrân- Hazretleri Câmi‘-i şerîfi kurbünde Malta Çarşısı’nda vâki‘ muhdes ve bâ-hatt-ı hümâyûn-ı şevket-makrûn mesdûd olan francalacı fırınlarından bir bâb münhedim francalacı fırınına mutasarrıfe olan merhûme ve mağfûrun-lehâ Hadîce Sultân -tâbe serâhu [serâhâ]- hazretleri bundan akdem bilâ-veled irtihâl-i dâr-ı bekā edip fırın-ı merkūm mahlûlen cânib-i vakf-ı şerîfe âid ve râci‘ olmuş ise de fırın-ı mezkûr münhedim ve harâbe nev‘inden olmak hasebiyle taraf-ı vakıfdan kimesne istîcare rağbet etmeyip vakf-ı şerîfe özr-i küllî olduğundan bahisle sıyâneten li’l-vakfi’ş-şerîf fırın-ı mezkûr yerine vakf-ı şerîf için müstagal olmak üzre menzil binâ ve inşâ olunması husûsuna müsâ‘ade-i aliyyeleri erzânî buyurulmasını vakf-ı mezbûr mütevellîsi Ahmed Şükrü Efendi dâ‘îleri bi’t-tevliye istid‘â eylediği mefhûm-ı arzuhâlden müstebân ve sultân-ı müşârün-ileyhâ hazretlerinin uhdesinden münhal emlâkin cânib-i mîrîden zabtına dâir ve inhâ olunan fırına mütedâir bir gûne kayd bulunmadığı muhallefât derkenârından nümâyân ve fi’l-vâki‘ fırın-ı mezkûr mukaddemâ bâ-hatt-ı hümâyûn-ı şevket-makrûn sedd ü bend olunmuş idüğü İstanbul Mahkemesi sicillinde mastûr ve mukayyed olmağın bu sûretde mütevellî-i mezbûrun istid‘âsı câiz ve meşrû‘ olup ancak ber-vech-i istid‘â izin ve ruhsat-ı seniyyeleri dahi erzânî buyurulur ise ol bâbda Dîvân-ı hümâyûn tarafından bâlâsı tuğrâ-yı garrâ ile müzeyyen bir kıt‘a emr-i celîlü’ş-şân sudûru muktezâ-yı maslahatdan idüğü İstanbul Mahkemesi’nden huzûr. Fî 7 C sene 1242