İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 261 Hüküm no: 202 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandoh bt. Agop’un Hasköy Yeni mahalledeki eve tasarruf iddiasının geçersizliği, eve Viçen b. Karabet’in tasarruf edeceği Hasköy’de Yeni mahallede menzil nizâ‘ı Ma‘rûz Mübârek rikâb-ı kamer-tâb-ı mülûkâneye takdîm olunan işbu arzuhâlde mezkûreti’l-ism mu‘arrefetü’ş-şahs Sandoh bt. Agop Nasrâniye Çarşamba günü Arz Odası’nda huzûr-ı lâmi‘u’n-nûr-ı âsafânelerinde bi’l-ma‘iyye rü’yete me’mûr nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi ma‘iyyetiyle akd olunan meclis-i şer‘-i münîrde zikri âtî menzile bâ-temessük-i mütevellî bi’l-icâreteyn mutasarrıf ve ol vechile vaz‘-ı yedi mütehakkık olan sahib-i arzuhâl Viçen v. Karabet zimmî muvâchesinde nezâret-i hazret-i müşârün-ileyhde âsûde evkāfdan şeyhülislâm-ı esbak-ı merhûm Dâmadzâde Ebulhayr Ahmed Efendi Vakfı’nın kāimmakām-ı mütevellîsi Müftizâde es-Seyyid Mustafa Efendi tarafından mürsel câbî-i vakf es-Seyyid Ahmed Efendi b. es-Seyyid Ömer hazır olduğu hâlde mersûm Viçen zimmînin vâzı‘u’l-yed olduğu vakf-ı mezkûrdan Havâss-ı Refî‘a kazâsına muzâfe kasaba-i Hasköy’de Yeni mahallede Kapıcıbağı nâm mahâlde vâki‘ ma‘lûmü’l-hudûd ve’l-müştemilât bir bâb menzil mukaddemâ bi’l-icâreteyn tasarrufumda iken bin iki yüz otuz üç senesi Şevvalinin beşinci günü hazır bi’l-meclis Tütüncü Hazer v. Mikayil zimmîye cihet-i karz ve tütün semeninden deynim olan bin beş yüz elli sekiz guruş mukābelesinde vefâen fâriğa olmuş iken hâzır-ı mersûm menzil-i mezkûru mesfûr Viçen zimmîye ferâğ etmekle ol dahi tefevvüz ve vaz‘-ı yed eder lâkin benim hâzır-ı mesfûra ferâğım vefâen olup deyn-i mezkûru dahi tamamen edâ ve îfâ etmemle menzil-i mezkûrdan keff-i yedine mersûm Viçen zimmîye tenbîh olunmak matlûbumdur deyü da‘vâ ettikde ol dahi cevâbında işbu yedimde olup meclis-i şer‘de kırâet olunan bin iki yüz otuz yedi senesi Muharreminin on dördüncü günüyle müverrah ve ol târihde İstanbul kādısı bulunan hâlâ Anadolu kazaskeri semâhatlü fazîletlü el-Hâc Mehmed Sadullah Efendi hazretleriyle târih-i mezkûrda evkāf müfettişi bulunan hâlâ askerî kassâmı Kütahyevîzâde fazîletlü es-Seyyid Mehmed Ârif Efendi’nin hatmleriyle mahtûm bir kıt‘a i‘lâm-ı şer‘îde tafsîl olunduğu üzre menzil-i mezkûr deyn-i merkūm bin beş yüz elli sekiz guruş mukābelesinde hâzır-ı mersûm Hazer zimmînin vefâen üzerinde iken hâmiş-i arzuhâlde mastûr defter-i vakf derkenârı mantûkunca zimmî-i mersûm menzil-i mezkûru sahibe-i evveli Nasrâniye-i mesfûreye ba‘de’r-red ve’l-ferâğ mersûme Sandoh Nasrâniye mersûm Hazer zimmîden dokuz yüz kırk iki guruş dahi karz alıp menzil-i mezkûru bin iki yüz otuz dört senesi Muharremi hilâlinde bedel-i misli olan iki bin beş yüz guruş bedel mukābelesiyle mersûm Hazer zimmîye bâ-re’y-i mütevellî kat‘iyen ferâğ ve tefvîz ve ol dahi tefevvüz ve kabûl ettikden sonra mersûme Sandoh Nasrâniye bedel-i mezkûru bi’t-terâzî deyn-i mezkûruna takāssan istifâ etmiş olmağla ol vechile menzil-i mezkûrda kat‘a alâkam kalmayıp mersûm Hazer zimmînin kat‘iyen dâhil-i havza-i tasarrufu olduğunu kādı-i müşârün ve müfettiş-i mûmâ-ileyhimâ huzûrlarında ikrâr dahi etmişdi deyü Nasrâniye-i mersûmenin inkârına mukārin mütevellî vekîli mezbûr ile hâzır-ı mersûmun tasdîkleriyle eyledikleri def‘ini ve mazmûn-ı i‘lâm-ı mezkûru lede’t-tezkiye adl ve makbûlü’ş-şehâde idükleri ihbâr olunan İstanbul Mahkemesi muhzırânından Ömer Çelebi b. Ahmed ve Mehmed Çelebi b. Hasan şehâdetleriyle bi’l-muvâcehe vech-i şer‘î üzre isbât etmeğin bu sûretde mersûme Sandoh Nasrâniye menzil-i mezkûru ba‘de’t-tahlîs muahharan mersûm Hazer zimmîye kat‘iyen fâriğa olup kat‘a alâkası kalmadığını dahi huzûr-ı şer‘de ikrâr etmiş iken menzil-i mezkûra bir vechile müdâhaleye kādire [41b] olmadığı kendüye tefhîm olunmağla menzil-i mezkûru bâ-re’y-i mütevellî hâzır-ı mersûmdan tefevvüz eden mersûm Viçen zimmînin zabt ve tasarrufu iktizâ eylediği İstanbul Mahkemesi’nden huzûr. Fî 3 C sene 1242