İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 262 Hüküm no: 203 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın, İbrahim Edhem Ağa’dan 2780 guruş davasının geçersiz olduğu Min-haysü’l-mecmû‘ 2780 guruş men‘ ve 67 buçuk guruş edâya ta‘ahhüd Ma‘rûz İstanbul hısnı ebvâbından Cibali ve Balat İskelelerinde mukaddemâ hammâlân kethudâsı olup işbu târihden bir buçuk ay mukaddem vatan-ı asl[î]olan Sivas kazâsına âzim olan Çolak Mehmed b. Abdullah nâm kimesnenin zevcesi ve tarafından husûs-ı âtîde vekîl olduğu Sakka Gümüşhâneli Kahraman oğlu es-Seyyid Mustafa b. es-Seyyid İbrahim ve Berber Sivaslı Tüfenkçioğlu es-Seyyid Süleyman b. Mustafa nâm kimesneler şehâdetleriyle ber-nehc-i şer‘î sâbit olan sahibe-i arzuhâl mu‘arrefetü’z-zât Emine bt. Abdullah nâm hatun meclis-i şer‘-i münîrde arka ve sırık hammâlânı baş kethudâlığının dört sehm i‘tibârıyla bir buçuk sehmine bâ-berât mutasarrıf olan derûn-ı arzuhâlde mezkûru’l-ism es-Seyyid İbrahim Edhem Ağa b. İbrahim Edhem nâm kimesne muvâcehesinde zevcim müvekkilim mezbûr Mehmed târih-i mezkûrda kazâ-i merkūma azîmeti esnâda ben zikrolunan Cibali ve Balat İskeleleri hammâlân kethudâlığının gediğini bundan akdem fevt olan Kayaoğlu es-Seyyid Ali’nin sulbî kebîr oğlu gāib ani’l-meclis es-Seyyid Hasan nâm kimesneden bin dört yüz guruşa satın aldığım hînde işbu yedimde olan gedik tezkiresi bâ-berât-ı âlî-şân baş kethudâlığın ber-i‘tibâr merkūm birer buçuk sehmden üç sehmine mutasarrıflar olan merkūm es-Seyyid İbrahim Edhem Ağa ile Sâdık Kethudâ ve bir sehmine mutasarrıf olan İsmail Kethudâ nâm kimesneler temhîr ve harc-ı temessük nâmıyla mâlımdan altmış yedişer buçuk guruşdan yüz otuz beş guruş mezbûrân es-Seyyid İbrahim Edhem Ağa ile Sâdık Kethudâ ve kırk beş guruş merkūm İsmail Kethudâ aldığından mâ‘adâ merkūm es-Seyyid İbrahim Edhem Ağa benim mâlımdan ve yedimden bilâ-temessük altı yüz guruş dahi iktirâz ve kabz etmekle sen min-haysü’l-mecmû‘ iki bin yedi yüz seksen guruş mezbûr es-Seyyid İbrahim Edhem Ağa’dan mutâlebe ve kabz eyle deyü ber-vech-i muharrer beni da‘vâ ve kabza tevkîline binâen bi’l-vekâle taleb ederim deyü eylediği da‘vâsında evvelen müvekkil-i merkūmun meblağ-ı mezkûr bin dört yüz guruşu gāib-i mezbûr es-Seyyid Hasan’a altmış yedi buçuk guruşu gāib-i merkūm Mehmed Sâdık Kethudâ’ya ve kırk beş guruşu gāib-i mezbûr İsmail Kethudâ’ya verdiğini mukırre ve mu‘terife iken mezbûr es-Seyyid İbrahim Edhem Ağa’dan mutâlebesi meşrû‘â olmadığı vekîl-i müdde‘iyye-i mezbûreye tefhîm olundukda ol dahi mücâb ve mülzem olup mâ‘adâ altı yüz altmış yedi buçuk guruş husûsunda istintâk olundukda cevâbında ancak altmış yedi buçuk guruş harc-ı temessük nâmıyla kabzını ikrâr ve i‘tirâf ve red ve teslîme müte‘ahhid olup lâkin altı yüz guruş iktirâz ve kabzını inkâr etmekle vekîl-i müdde‘iyye-i mezbûre ber-vech-i muharrer altı yüz guruş müdde‘âsına ikāmet-i beyyine edemeyip bi’t-taleb merkūm es-Seyyid İbrahim Edhem Ağa bi’l-muvâcehe vech-i şer‘î üzre tahlîf olunmağın mûcibince vekîl-i müdde‘iyye-i mezbûre Emine Hatun meblağ-ı mezkûr altı yüz guruş mutâlebesiyle merkūm es-Seyyid İbrahim Edhem Ağa’ya bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 15 Ca sene 1242