İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 263 Hüküm no: 204 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hrubsima bt. İstefan’ın, tuhafçı ve fincancı gediğini, oğlu Hekim Abraham v. Oseb’e sattığı Fincâncı ve tuhafçı gediği mübâya‘ası Ma‘rûz Zikri âtî gedik âlât-ı lâzımesine bâ-sûret müstakilleten mâlike olan Yazıcı zevcesi demekle arîfe şahsı mu‘arrefe Hrubsima bt. İstefan nâm Nasrâniye meclis-i şer‘-i hatîrde sadrî kebîr oğlu Hekîm Abraham v. Oseb nâm zimmî muvâcehesinde takrîr-i kelâm edip bu def‘a bâ-irâde-i seniyye hedm ve ref‘ olunan İstanbul’da Sultân Bâyezid-i Velî Han Hazretleri Câmi‘-i şerîfi havlîsinde Kolluk tahtında çeşme sırasında kâin Hâfız Mehmed Emin Ağa dükkânı ittisâlinde bir bâb tuhafçı ve fincâncı dükkânı derûnunda mevcûde Başmuhâsebe kaleminde ismime mukayyed ve mu‘teber şurût-ı nizâmda dâhil beyne’l-esnâf gedik ta‘bîr olunur bir çekmece ve bir akçe tahtası ve sâir âlât-ı lâzıme-i ma‘lûmeyi bi’l-müsâ‘ade tahlîs edip ol vechile mâlike olduğum âlât-ı lâzıme-i muharrere-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin oğlum mersûm Abraham zimmîye dört yüz guruş semen-i medfû‘a ve makbûza bey‘ ve temlîk ve teslîm eylediğimde ol dahi ber-vech-i muharrer ba‘de’l-iştirâ ve’t-temellük ve’t-tesellüm ve’l-kabûl mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik deyü ba‘de’l-ikrâr ve’t-tasdîk gedik-i mezkûrun kayd-ı evveli ref‘ ve terkīn ve oğlu mersûm Abraham zimmî ismine tasrîhan kayd ile yedine müceddeden bir kıt‘a sûret i‘tâsını mersûm Abraham zimmî istid‘â ve istirhâm eylediği İstanbul Mahkemesi’nden huzûr. Fî 16 min-Ca sene 1242