İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 264 Hüküm no: 205 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleni bt. Dimitri’nin, Çarşı-yı Kebir’deki kazzaz gediğini, İstavri v. Mihal’e sattığı Kazzâz mübâya‘ası ve ismine tasrîh Ma‘rûz İstanbul hısnı ebvâbından Fenâr kapısı dâhilinde Camcı Ali mahallesinde mütemekkine Eleni bt. Dimitri Nasrâniyenin zevci ve tarafından ber-vech-i âtî bey‘a ve kabz-ı semene vekîl olduğu şahsını bilir kazzâz esnâfından Petro v. Yuvan ve Yuvan v. Yani nâm zimmîler şehâdetleriyle ber-nehc-i şer‘î sâbit olan yine esnâf-ı mezbûreden Andon v. Hristo nâm zimmî meclis-i şer‘-i hatîrde yine esnâf-ı merkūmeden İstavri v. Mihal nâm zimmî muvâcehesinde bi’l-vekâle takrîr-i kelâm edip müvekkilem zevcem mersûme Eleni Nasrâniye İstanbul’da Çarşı-yı Kebîr’de Çakır Ağa zukāğı demekle ma‘rûf sûkda Du‘â Meydânı nâm mahâlde Yağlıkçılar köşesinde Sipâh Pazarı’na varınca[ya] değin sûkda vâki‘ Kazzâz Andon ve Hristo zimmîler dükkânları beynlerinde kâin bir kepenk bir bâb kazzâz dükkânı derûnunda mevcûde akd-i âti’z-zikrin sudûruna değin Başmuhâsebe kaleminde müvekkilem zevcem mersûmenin ismine mukayyed ve mu‘teber beyne’l-esnâf gedik ta‘bîr olunur bâ-sûret müstakilleten yedinde emvâli olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin üç bin iki yüz yirmi guruş semen-i medfû‘ ve makbûza bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî bi’l-vekâle ve bi’l-asâle ibrâ ve ıskāt eyledik deyü ba‘de’l-ikrâr ve’t-tasdîk gedik-i mezkûrun kayd-ı evveli bâyi‘a-i müvekkile-i mersûme üzerinden ref‘ ve terkīn ve müşteri-i mersûm İstavri zimmî ismine tasrîhan kayd ile yedine müceddeden bir kıt‘a sûret i‘tâsını istid‘â ve istirhâm eylediği İstanbul Mahkemesi’nden huzûr. Fî 16 min-Ca sene 1242