İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 265 Hüküm no: 206 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin b. Mehmed Emin’in, İskenderiyeli Abdullah b. Mehmed’e olan 1950 guruş borcunu ödemesi gerektiği 1950 guruş ilzâm Ma‘rûz Mısır tüccârından arzuhâl eden İskenderiyeli es-Seyyid Abdullah b. Mehmed bi’r-râzı dâ‘îhânelerinde ma‘kūd meclis-i şer‘-i münîrde hasırcı esnâfından derûn-ı arzuhâlde mezkûru’l-ism Mehmed Emin b. el-Hâc Mehmed Emin muvâcehesinde mezbûr Mehmed Emin zimmetinde bundan akdem yedimden ve mâlımdan iştirâ ve kabz eylediği mikdâr ve fiyâtı beynimizde ma‘lûm Mısır hasırı semeninden ba‘de külli’l-hesâb sahhu’l-bâkī hakkım olan on bir bin sekiz yüz doksan guruşun bin dokuz yüz on sekiz guruşunu <> mukaddemâ rızâmla hat ve tenzîl edip bâkī kalan dokuz bin dokuz yüz yetmiş iki guruş ve esnâf-ı merkūme yazıcısı gāib ani’l-meclis es-Seyyid Mehmed Şâkir Efendi ibnü’l-Hâc Hüseyin zimmetinde [42a] semen-i mebî‘den alacağım olup bundan akdem cümlemiz bir meclisde hazır olduğumuz hâlde ol mikdâr medyûnu merkūm Mehmed Emin üzerine kabûlü hâvî havâle-i mukayyede ile havâle eylediği iki bin on üç guruş ki cem‘an on bir bin dokuz yüz seksen beş guruşun on bin otuz beş guruşunu mezbûr Mehmed Emin ceste ceste bana edâ ve teslîm etmekle bâkīsi olan bin dokuz yüz elli guruşu dahi mezbûrdan hâlâ taleb ederim deyü da‘vâ ol dahi ber-vech-i muharrer ikrâr ve i‘tirâf etmeğin alâ-mûcibi ikrârihî meblağ-ı bâkī-i merkūm bin dokuz yüz elli guruşun müdde‘î-i mezbûr es-Seyyid Abdullah’a edâsıyla merkūm Mehmed Emin ilzâm olunduğu İstanbul Mahkemesi’nden huzûr. Fî 25 Ca sene 1242