İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 266 Hüküm no: 207 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karagöz v. Yorgi ve Abraham v. Dimitri’nin, sabun tüccarına olan kefaletlerinin geçersiz olduğu 5384 guruş para kefâlet men‘i Ma‘rûz Âsitâne-i aliyyede vâki‘ sabun tüccârından olup ber-vech-i âtî sahhu’l-bâkī yüz altmış altı guruş iddi‘â eden Nâzır Mehmed Ağa b. Mustafa ve bin yüz altmış iki guruş on sekiz para iddi‘â eden Şahin Ağa b. Hüseyin ve yedi yüz yetmiş dokuz guruş otuz iki para iddi‘â eden es-Seyyid el-Hâc Emrullah Ağa b. es-Seyyid İbrahim ve yüz doksan üç buçuk guruş iddi‘â eden Molla Salih b. Hüseyin ve iki yüz doksan üç guruş üç para iddi‘â eden Hüseyin b. Mustafa ve yetmiş iki guruş otuz altı para iddi‘â eden es-Seyyid Mehmed b. Abdullah nâm kimesneler ile ve bin sekiz yüz guruş iddi‘â eden kendi nefsinden asîl ve şerîki Vasil v. Yorgi zimmî tarafından vekîl-i müsbet-i şer‘îsi Ahmed b. Mehmed ve yüz beş guruş beş para iddi‘â eden Panayot v. Yani ve iki yüz kırk yedi guruş dört para iddi‘â eden Dimitri v. Panayot ve yetmiş altı guruş yirmi beş para iddi‘â eden Sarı Yorgi v. Yani ve yüz yetmiş guruş otuz üç para iddi‘â eden Vasil v. Yorgi ve üç yüz otuz altı guruş yirmi dokuz para iddi‘â eden Manol v. Yorgi nâm zimmîler <> meclis-i şer‘-i münîrde Karagöz v. Yorgi ve Abraham v. Dimitri zimmîler muvâcehelerinde esnâf-ı merkūmeden Odunkapısı dâhilinde Sabuncu Marat v. Lefter zimmî hazır olduğu hâlde mersûmân Karagöz ve Abraham zimmîler mukaddemâ bizim gıyâbımızda Odunkapısı’nda Sabuncu Marat zimmîye sabun tüccârı ne kadar mâl verirse biz kefîliz demişler olup biz dahi mersûma verdiğimiz sabun esmânından sahhu’l-bâkī cem‘an beş bin üç yüz seksen dört guruş beş para alacağımız olmağla meblağ-ı mecmû‘-ı merkūmu zimmiyân-ı mesfûrânın mücerred öyle demiş olduklarına binâen bi’l-kefâle taleb ederiz dedikleri fetvâ-yı şerîfeye lede’l-havâle tarafeyn bi’l-muvâcehe istiftâ eylediklerinde ber-muktezâ-yı şerî‘at-i garrâ mekfûlün-leh mekfûlün-bih mechûl iken kefâlet sahîha olmadığı iftâ buyurulmağın mûcibince müdde‘ûn-ı merkūmûn meblağ-ı mecmû‘-ı mezkûr beş bin üç yüz seksen dört guruş beş para mutâlebeleriyle mersûmân Karagöz ve Abraham zimmîlere bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 7 C sene 1242