İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 274 Hüküm no: 216 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma Kadın bt. Abdullah’ın, Selim Sâbit Efendi b. Mehmed Efendi ile kira davasında 80 guruşa sulh olduğu Menzil icâresinden 80 guruş sulh ve ibrâ Ma‘rûz Bâ-işâret-i aliyye-i hazret-i şeyhülislâm-ı sellemehü’s-selâmî sâdır olan fermân-ı âlîlerine imtisâlen sahibe-i arzuhâl mu‘arrefetü’z-zât Esma Kadın bt. Abdullah meclis-i şer‘-i münîrde derûn-ı arzuhâlde mezkûru’l-ism müderrisîn-i kirâmdan Selim Sâbit Efendi b. es-Seyyid Mehmed Efendi muvâcehesinde İstanbul’da Uzun Çarşı sûkunda Nerdübânlı hamam civârında kâin bâ-temessük-i mütevellî bi’l-icâreteyn taht-ı tasarrufumda olup mu‘addün li’l-istiğlâl olan bir bâb vakıf menzilimi bin iki yüz kırk bir senesi Saferü’l-hayrı gurresinde tarafımdan vekîlim işbu hazır bi’l-meclis Berber es-Seyyid Ahmed Ağa b. İsmail beher şehr ellişer guruş kirâ kavliyle bi’l-vekâle mûmâ-ileyh Selim Sâbit Efendi’ye îcâr ve teslîm eylediğinde ol dahi ber-vech-i muharrer istîcâr ve kabûl ve bir sene derûnunda sâkin olup istifâ-yı menfa‘at etmekle müddet-i mezkûrede kirâ-yı merkūmdan zimmetinde müctemi‘ olan altı yüz guruşun dört yüz altmış guruşunu yine vekîlim hâzır-ı merkūm yediyle bana edâ ve teslîm edip bâkīsi olan yüz kırk guruş el-yevm zimmetinde kalmağla meblağ-ı bâkī-i merkūm yüz kırk guruşu dahi mûmâ-ileyh Selim Sâbit Efendi’den taleb ederim deyü hâzır-ı merkūm es-Seyyid Ahmed Ağa’nın tasdîkiyle tesâddî eylediğim da‘vâmdan mûmâ-ileyh Selim Sâbit Efendi ile bi’t-tav‘ ve’r-rızâ seksen guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâdesine ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik deyü mukırre-i mezbûre Esma Kadın’ın cemî‘ takrîr-i meşrûhunu mûmâ-ileyh Selim Sâbit Efendi tasdîk ve bedel-i sulh-ı merkūm seksen guruş zimmetinde müdde‘iyye-i mezbûre Esma Kadın’a sahîhan deyni olduğunu ikrâr ve i‘tirâf etmeğin alâ-mûcib-i ikrârihî bedel-i sulh-ı merkūm seksen guruşun müdde‘iyye-i mezbûre Esma Kadın’a edâsıyla mûmâ-ileyh Selim Sâbit Efendi ilzâm olunduğu İstanbul Mahkemesi’nden huzûr. Fî 20 C sene 1242