İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 275 Hüküm no: 218 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatice bt. Halil’in, eşi Halil b. Mehmed Emin’in köyüne gitmek istemediği İtâ‘ate tenbîh Ma‘rûz Kurb-i Dârü’s-saltanati’s-seniyyede Baruthâne-i âmireye merbût Azadlı karyesi ahâlîsinden arzuhâlde ismi mezkûr Halil b. Mehmed Emin nâm kimesne meclis-i şer‘-i münîrde sahibe-i arzuhâl mu‘arrefetü’z-zât Şerife Hadîce bt. es-Seyyid Halil nâm hatun muvâcehesinde ben bundan akdemce mezbûre Şerife Hadîce Hatun’u Der-aliyye’den karye-i mezbûreye götürmek üzre altı yüz guruş mehr-i mu‘accel ve üç yüz elli guruş mehr-i müeccel tesmiyeleriyle İstanbul’da tezevvüc ve mehr-i mu‘accelini îfâ ettikden sonra karye-i mezbûreye götürüp duhûl ve üç ay hüsn-i mu‘âşeret etmiş iken zevce-i menkûha-i medhûlün-bihâm mezbûre Şerife Hadîce Hatun karye-i mezbûreden firâr ve Âsitâne-i aliyyeye gelip karye-i mezbûreye gitmekden imtinâ‘ ile bana itâ‘at ve hukūk-ı zevciyete ri‘âyet etmemekle suâl olunup benimle ma‘an karye-i mezbûreye gidip galak ve merâfıkı başka menzilimde ikāmet-birle bana itâ‘at ve hukūk-ı zevciyete ri‘âyete mezbûre Şerife Hadîce Hatun’a tenbîh olunmak matlûbumdur dedikde ol dahi cevâbında müdde‘î-i mezbûrun mehreyn-i mezkûreyn ile zevce-i menkûha-i medhûlün-bihâsı olduğunu ve mehr-i mu‘accelini istifâ eylediğini ve karye-i mezbûre Âsitâne-i sa‘âdete mesâfe-i sefer olmadığını ikrâr ve i‘tirâf edip ancak zevcim mezbûrun karyesine gitmem deyü imtinâ‘ ettikde ilzâm için fetvâ-yı şerîfeye lede’l-havâle tarafeyn mübâşir ma‘rifetiyle bi’l-muvâcehe varıp istiftâ eylediklerinde Zeyd bir kasaba ahâlîsinden Hind’i o kasabada tezevvüc ettikden sonra mehr-i mu‘accelini îfâ etmekle Hind’i mesâfe-i seferden ekall olan kendi karyesine götürmek istedikde Hind imtinâ‘a kādire olmaz deyü iftâ buyurulmağın mûcibince ber-muktezâ-yı şerî‘at-i garrâ mezbûre Şerife Hadîce Hatun karye-i mezbûreye gitmekden imtinâ‘a kādire olmadığı kendüye tefhîm ve karye-i mezbûrede zevci merkūmun galak ve merâfıkı başka menziline gidip itâ‘ate tenbîh olunduğu İstanbul Mahkemesi’nden huzûr. Fî 24 C sene 1242 [Beyaz Beyaz]