İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 276 Hüküm no: 219 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Hidâyetullâh Camii’nin tevliyetinin, Mustafa b. Halil’e tevcih edilmek istendiği Tevliyet tevcîhi istid‘âsı Ma‘rûz Reisülküttâb Efendi dâ‘îlerinin bâlâ-yı arzuhâlde muharrer i‘lâmı nâtık olduğu üzre ber-mûcib-i kayd Adala kazâsına tâbi‘ Bâzergânlı karyesinde vâki‘ es-Seyyid Ali Bey b. Hidâyetullâh Câmi‘-i şerîfinin yevmî on iki akçe vazîfe ile ber-vech-i meşrûta tevliyetine mutasarrıf olan vâkıf-ı mûmâ-ileyh Ali Bey ba‘de’l-vefât tevliyet-i mezbûre evlâd-ı vâkıfdan es-Seyyid Halil nâm kimesneye ba‘de’l-intikāl kable’t-tevcîh merkūm es-Seyyid Halil dahi fevt olduğundan bahisle tevliyet-i mezkûre mahlûllerinden kendüye tevcîh buyurulmak bâbında sahib-i arzuhâl müteveffâ-yı merkūm Seyyid Halil’in oğlu es-Seyyid Mustafa istid‘â-yı inâyet edip ve fi’l-hakīka merkūm Seyyid Halil sahib-i arzuhâlin babası ve vâkıf-ı mûmâ-ileyhin kızının oğlu tevliyet-i mezbûreye bilâ-berât mutasarrıf olup ba‘de vefâtihî oğlu merkūm Seyyid Mustafa’ya bi’l-inhisâr intikāl eylediğini ve merkūm Seyyid Mustafa dahi umûr-ı vakfı rü’yete muktedir idüğünü erbâb-ı vukūfdan es-Seyyid Ahmed Efendi b. es-Seyyid Hüseyin ve el-Hâc Halil Ağa b. Mehmed nâm kimesneler alâ-tarîkı’ş-şehâde haber vermeleriyle tevliyet-i mezbûre müteveffeyân-ı merkūmânın mahlûllerinden sahib-i arzuhâl merkūm es-Seyyid el-Hâc Mustafa’ya vazîfe-i mersûmesiyle tevcîh ve yedine berat-ı âlî-şân sadaka ve ihsân buyurulmak bâbında emr u fermân hazret-i veliyyü’l-emrindir. Fî 24 Ca sene 1242